ეკონომიკა მხოლოდ ნაწილობრივ გაიხსნება. კომენდანტის საათი მთელი საქართველოს მასშტაბით ნარჩუნდება. დაკეტილი რჩება სამთო კურორტები და რესტორნები, ფიტნესი და გასართობი ცენტრები. თბილისში არც საზოგადოებრივი ტრანსპორტი აღდგება, ერთდაერთ გამონაკლისს სავაჭრო ცენტრები წარმოადგენს, ისინიც მხოლოდ ორშაბათი-პარასკევი შეძლებენ მუშაობას.

გალერია თბილისის დირექტორმა ნიკა ცინცაძემ Commersant-თან საუბრისას აღნიშნა რომ სავაჭრო ცენტრის მდებარეობის გათვალისწინებით, პანდემიამდელ პერიოდში, შაბათ-კვირას მომხმარებელთა რაოდენობა და ვაჭრობის მოცულობა, ქალაქგარეთ მდებარე მოლებისგან განსხვავებით, სამუშაო დღეების მაჩვენებლებს მხოლოდ 10%-ით აღემატებოდა.  

იმის გათვალისწინებით, რომ მაღაზიების თანამშრომლებს საშვები არ აქვთ, სავაჭრო ცენტრი 19:00 სთ-ზე დაიკეტება. თანამშრომლების ტრანსპორტირებას მაღაზიები ტაქსებით მოახდენენ. კითხვაზე თუ რამდენად შეძლებს ასეთ ვითარებაში მომხმარებელი მისვლას, რომელიც სამსახურს, თუნდაც დისტანციურად იმავე დროს ამთავრებს ნიკა ცინცაძემ გვიპასუხა, რომ წინა პერიოდში მართლაც მომხმარებელთა დიდი ნაწილი მოლს საღამოს საათებში სტუმრობდა, თუმცა მდგომარეობის შესაბამისად მათი ქცევა შეიცვალა. თუ ადრე ფასიანი ავტოსადგომით მომხმარებელთა 60% სარგებლობდა და სავაჭრო ცენტრში სამი საათით რჩებოდა, ახლა მათი რიცხვი 20%-მდეა შემცირებული, ანუ ისინი მოლში 1 საათზე ნაკლებ დროს ატარებენ. გარდა იმისა, რომ სავაჭრო ცენტრებში კვების ობიექტები არც დეკემბრის ბოლო კვირას გახსნილა და არც ახლა გაიხსნება, შემცირებულია იმ ადამიანთა რაოდენობაც, რომლებიც რაიმეს შერჩევაში ან უბრალოდ დასათვალიერებლად ატარებდნენ დიდ დროს.

Commersant დეკემბერში ერთკვირიანი მუშაობის პერიოდითაც დაინტერესდა, რაზედაც გალერია თბილისის დირექტორმა განგვიცხადა, რომ ვაჭრობის მოცულობა 2019 წლის ანალოგიურ პერიოდთან შედარებით მართლაც შემცირებული იყო, თუმცა ამის მიზეზი შემცირებული სამუშაო საათები გახდა, მოლები 22:00-ის მაგივრად 19:00-ზე იკეტებოდა.

„გალერია თბილისი“ თანაინვესტირების ფონდის პროექტია. სავაჭრო ცენტრი რუსთაველის გამზირზე, ყოფილი „უნივერმაღი თბილისის“ ადგილას 2017 წლის 30 ნოემბერს გაიხსნა. ინვისტირებული თანხის მოცულობამ $100 მლნ შეადგინა. მაღაზიების გარდა სავაჭრო ცენტრში კვების ობიექტები, ბანკები, კინო-თეატრი, ბოულინგ-ცენტრი და სასტუმროა განთავსებული. კვების ობიექტებს, კონო-თეატრსა და გასართობ ცენტრებს შეზღუდვების მოხსნა არ შეეხებათ.

გიორგი ელიზბარაშვილი