საქართველოს მთავრობის დადგენილების მიხედვით, საქართველოს მთელ ტერიტორიაზე ვალუტის გადამცვლელი პუნქტები ჩვეულ სამუშაო რეჟიმს დღეიდან დაუბრუნდნენ.
„საქართველოს ვალუტის გადამცვლელთა ასოციაციის“ აღმასრულებელმა დირექტორმა ნინო ქავთარაძემ „კომერსანტთან“ საუბრისას აღნიშნა, რომ 800-მდე სავალუტო ჯიხური უკვე გაიხსნა, თუმცა, მომხმარებელთა რაოდენობა ჯერჯერობით ძალიან მცირეა.
„დღესდღეობით 800-მდე სავალუტო პუნქტი გაიხსნა, საბოლოოდ მათ ოპერირების საშუალება მიეცათ. ჯანდაცვის სამინისტროს რეკომენდაციებს ვიცავთ და მაქსიმალურად ყველაფერს ვითვალისწინებთ. ამ ეტაპზე მარეგულირებლის მხრიდან სხვა დამატებითი რეკომენდაციები, გარდა ჯანდაცვის სამინისტროსა არ გვაქვს. ასევე აღსანიშნავია, რომ ამ რეკომენდაციების დაცვა ხარჯებთან არის დაკავშირებული და იმის გათვალისწიებით, რომ 31 მარტიდან სავალუტო ჯიხურები დახურულები იყვნენ, არანაირი შემოსავლები არ ჰქონდათ, ვალდებულებები კი ძალაში რჩებოდა, ამიტომ სექტორი ძალიან მძიმე მდგომარეობაშია. რაც შეეხება, მომხმარებელთან ნაკადს, ძალიან მცირე რაოდენობით შეინიშნება, თუმცა ვიმედოვნებთ, რომ პირველი დღეა და მომდევნო დღეებში გაიზრდება“, - განაცხადა ნინო ქავთარაძემ.
შპს „დიკაში“ „კომერსანტს“ განუცხადეს, რომ ისინი ჯანდაცვის სამინისტროს რეკომენდაციებს მაქსიმალურად იცავენ, თუმცა ჯერჯერობით მომხმარებლები მცირე რაოდენობით ჰყავთ, რადგან მოსახლეობა გადასული იყო ბანკებში და მიკროსაფინანსოებში თანხის გადახურდავებაზე.
„დეზობარიერები დავდგით, სადეზინფექციო სითხეები გვაქვს, ხდება თერმოსქრინინგი, პირბადეების მოხმარება ანუ მაქსიმალურად ვიცავთ ჯანდაცვის სამინისტროს რეკომენდაციებს. ჯერჯერობით მომხმარებლები მცირე რაოდენობით გვყავს, რადგან მოსახლეობა გადასული იყო ბანკებში და მიკროსაფინანსოებში თანხის გადახურდავებაზე, ალბათ ჯერ არც იციან ჩვენი გახსნის შესახებ, თუმცა შემდეგ დღეებში ვფიქრობ, რომ გაიზრდება“, - განაცხადეს შპს „დიკაში“.
შპს „სან ინვესტში“ იმედოვნებენ, რომ მომდევნო დღეებში მომხმარებელთა რაოდენობა უფრო მეტად გაიზრდება, რადგან უფრო მეტი მათგანი გაიგებს სავალუტო ჯიხურების გახსნის შესახებ.
„ყველანაირ რეკომენდაციებს ვიცავთ და ჯანდაცვის სამინისტროს რჩევებს მაქსიმალურად ვითვალისწინებთ. მომხმარებელთა რაოდენობა დილიდან შეინიშნება, თუმცა, რა თქმა უნდა ეს ის რაოდენობა არ იყო რაც ადრე. ვიმედოვნებთ, რომ მომდევნო დღეებში უფრო მეტი გაიგებს ჩვენი გახსნის შესახებ ინფორმაციას და გააქტიურდებიან“, - განაცხადეს შპს „სან ინვესტში“.
შეგახსენებთ, რომ Covid 19-ს პრევენციის მიზნით, არასაბანკო ფინანსური სექტორის საქმიანობა 31 მარტს შეწყდა. დროებით მუშაობა შეწყვიტეს სესხის გამცემმა ორგანიზაციებმა, რომლებიც ოფისიდან მუშაობენ, ასევე, ვალუტის გადამცვლელმა ჯიხურებმა და სხვა საფინანსო სფეროში მოღვაწე კომპანიებმა.
ნინო თამაზაშვილი