2021 წელი ინსტიტუტების მიერ კრიპტოვალუტების საბოლოოდ მიღების წელი იყო. ახლა საინვესტიციო მენეჯერები ამბობენ, რომ აქტივების კლასი მომავალ წელს დიდი გაყიდვისთვის მზადაა.
გამოკითხული ინსტიტუტების თითქმის სამი მეოთხედი ამბობს, რომ ციფრული აქტივები 2022 წელს დიდი კორექტირების კანდიდატია. Natixis Investment Managers-ისთვის ჩატარებული გამოკითხვის თანახმად, ისინი საცალო ინვესტორებისთვის შესაბამისი ინვესტიცია არ არის.
ამავდროულად, ყველა გამოკითხული ინსტიტუტის 28% ამჟამად კრიპტოვალუტებში ინვესტიციებს ახორციელებს. მათგან, თითქმის მესამედმა განაცხადა, რომ მომავალ წელს კრიპტო ინვესტიციების ზრდას გეგმავს.
მიმდინარე წელს მრავალმა მსხვილი ფონდის მენეჯერმა შეაბიჯა კრიპტო სამყაროში. ინდუსტრიაში ასევე ჩაერთო მრავალი მსხვილი ინვესტორი. ბევრმა აღნიშნა, რომ ციფრული აქტივები, როგორიცაა ბიტკოინი, შესაძლოა ინფლაციის ჰეჯირების კარგი საშუალება იყოს.
მიუხედავად იმისა, რომ კრიპტო ძალიან ცვალებადია, არ არის გამორიცხული, რომ სხვადასხვა მონეტებმა უზარმაზარი მოგება დააფიქსირონ. Bloomberg Galaxy Crypto Index-მა, რომელიც უმსხვილესი კრიპტოვალუტების ინდექსია 2021 წელს დაახლოებით 200%-იანი ზრდა აჩვენა.
მას შემდეგ, რაც ბიტკოინმა მეინსტრიმში შეაღწია, მისი ფასი ბოლო ხუთი წლის განმავლობაში 5000%-ზე მეტით გაიზარდა.
წყარო: Bloomberg, "ბიზნეს ფორმულა"