10 წლიანი ინვესტიციის განხორციელების შედეგად, კომპანია „ალგი+“  ქართული ხიზილალის ბრენდის ქვეშ წარმოებას იწყებს.  შპს. „ქართული თევზის“,  შპს. „ალგი+“-ის  და „უმალის“ დამფუძნებელი ალექსანდრე დადიანიძე „კომერსანტთან“ საუბრისას განმარტავს, რომ ხიზილალა ადგილობრივ ბაზარზე იქნება გათვლილი და სამომავლოდ წარმოების გაფართოებაც იგეგმება.

„შავ ხიზილალას ველოდებით მომავალი წლისთვის, სავარაუდოდ საგაზაფხულოდ მივიღებთ ამ პროდუქტსაც. ცოტა ხნის წინ,  გვყავდა იხტიოლოგები გერმანიიდან. ხიზილალაში 10 წლიანი ინვესტიციაა ჩადებული და ყოველ გაზაფხულს ველოდებით. შავი ხიზილალა მცირე რაოდენობით იქნება, დაახლოებით 100-150 კილოგრამი და ადგილობრივ ბაზარზეა გათვლილი.  ჩვენ ვოპერირებთ „ქართული ხიზილალის“ სახელით. თევზსაშენი კი გორში მდებარეობს,“— განმარტავს ალექსანდრე დადიანიძე. 

 შავი ხიზილალის წარმოებაში კომპანიამ 160 000 დოლარის ინვესტიცია ჩადო, რომლის შედეგსაც ბოლო ორი წელია ელოდება. 

ამ ეტაპზე საწარმოს გაფართოების პროცესი მიმდინარეობს. „ალგი+“-მა 2011 წელს წითელი ხიზილალის წარმოება დაიწყო და ამჟამად წელიწადში 2 ტონა პროდუქციას ყიდის.

მარიამ მორგოშია