„სავალუტო ფონდი პროგნოზით მომავალი 7 წლის მანძილზე საქართველო ერთ-ერთი ლიდერი იქნება არამარტო რეგიონში, არამედ მთლიანად პოსტ საბჭოთა სივრცეში და ევროპაშიც მშპ-ს ზრდის მიხედვით“, — ამის შესახებ პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ განაცხადა.

„სავალუტო ფონდმა პროგნოზები გამოაქვეყნა მსოფლიოში და რეგიონში ეკონომიკურ ზრდასთან დაკავშირებით. IMF პერიოდულად ახდენს პროგნოზების განახლებას. საქართველო რეგიონში ლიდერია ეკონომიკურ ზრდასთან დაკავშირებით და მომდევნო 7 წელთან მიმართებაშიც ასეა. გამომდინარე აქედან მიმაჩნია რომ ეს პროგნოზი ძალიან კარგია, ჩვენ გვაქვს ეკონომიკური ზრდის კარგი სტარტი პირველი 2-3 თვის განმავლობაში. მომავალი 7 წლის მანძილზე რასაც სავალუტო ფონდი აქვეყნებს საქართველო ერთ-ერთი ლიდერი იქნება არამარტო რეგიონში, არამედ მთლიანად პოსტ საბჭოთა სივრცეში და ევროპაშიც მშპ-ს ზრდის მიხედვით. თუმცა მიმაჩნია, რომ პროგნოზებთან მიმართებაში მომდევნო 2-3 თვე არის საჭირო, რომ რეალობა დავინახოთ თუ რა გავლენას მოახდეს რუსეთ-უკრაინის ომი საქართველოს ეკონომიკაზე. ჩვენ ბიუჯეტი დაგეგმილი გვაქვს 6%-იან ზრდაზე, გარკვეული კორექტირება დაგვჭირდება, მაგრამ მაინც კარგია ის პროგნოზები, რასაც სავალუტო ფონდი საქართველოსთან მიმართებაში აქვეყნებს“, — ამბობს კოვზანაძე.

საერთაშორისო სავალუტო ფონდმა (IMF) 2022 წლის გლობალური ეკონომიკური ზრდის პროგნოზი 4.4%-დან 3.6%-მდე შეამცირა. 191 ქვეყანას შორის საქართველოს 2022 წლის მშპ ერთ მოსახლეზე რიგით 105-ე ადგილზეა.  რეგიონის ქვეყნების მშპ ერთ მოსახლეზე კი ასე ნაწილდება: სომხეთი - $4,741 დოლარი, 114-ე ადგილი; აზერბაიჯანი - $7,165 დოლარი, 91-ე ადგილი; თურქეთი - $8,081 დოლარი, 87-ე ადგილი; რუსეთი - $12,575 დოლარი, 69-ე ადგილი; უკრაინა - IMF პროგნოზს ვერ აკეთებს.