2020 წლის 4 ნოემბერი, საქართველოში პირველი ინფიცირების შემთხვევიდან დღემდე ქვეყანაში გამოვლენილი კოვიდ 19-ის დადასტურებული შემთხვევების საერთო რაოდენობა 44 522-ს შეადგენს. საქართველოს მთავრობა გვეუბნება, რომ პანდემიას წარმატებით უმკლავდება, თუმცა განსხვავებულია სურათი, რომელზეც ჯანდაცვის ექსპერტები და ოპოზიციონერი პოლიტიკოსები საუბრობენ. სისტემის გაუმართაობის შესახებ ყოველდღიურად ათობით პოსტს შეხვდებით სოციალურ ქსელშიც. ჯანდაცვის სამინისტროს მუშაობით უკმაყოფილო „საქართველოს კლინიკების ასოციაცია“. ასოციაციის პრეზიდენტი ვილი პაჭკორია აცხადებს, რომ ეკატერინე ტიკარაძის უწყება პანდემიას ვერ უმკლავდება. მისი თქმით, სამინისტროს ქმედითი ნაბიჯების გადადგმა დააგვიანდა. ვილი პაჭკორია „კომერსანტთან“ იმ ხარვეზებზე საუბრობს რომელიც საქარათველომ ვირუსთან ბრძოლის დროს დაუშვა.

„სამწუხაროდ ჯანდაცვის სამინისტრო პანდემიას ისე ვერ უმკლავდება, როგორც უნდა უმკლავდებოდეს, უფრო მეტი შეგვეძლო, გვქონდა იმის დროც და საშუალებაც, რომ მეტად მოვმზადებულიყავით. სამწუხაროდ ვერ მოვახერხეთ, რომ სამ მილიონიან ქვეყანაში დაავადებულთა რიცხვი უფრო ნაკლები ყოფილიყო და ყოველდღიურად ამდენი გარდაცვლილი არ გვყოლოდა. პირველ რიგში ჯანდაცვის სამინისტროს რაც უნდა გაეკეთებინა ეს იყო დროული ტესტირებები. ინტენსიური ტესტირებები გაზაფხულიდან უნდა დაწყებულიყო , ეს პროცესი დაგვიანდა. უნდა მომხდარიყო მედპერსონალის და არამხოლოდ მედპერსონალის გადამზადება.  ახლა სტუდენტების დახმარება გახდა საჭირო და მათი გადამზადებაც აუცილებელი იყო, ეს ყველაფერი მაისის თვეში უნდა გაკეთებულიყო. ამას გარდა, ყველა კლინიკის, თუნდაც ერთი სართული უნდა მომზადებულიყო და ყოფილიყო მობილიზებული კოვიდის საწინააღმდეგოდ. უნდა  მომზადებულიყო საწოლფონდი, აპარატურა, ლაბორატორიები. ეს ყველაფერი მაისის ბოლოს, რომ ყოფილიყო მოწესრიგებული, ჩვენ შემოდგომაზე ამხელა გაუგებრობის წინაშე არ აღმოვჩნდებოდით, ფაქტობრივად კლინიკები დაკეტილია, რადგან არ აქვთ პაციენტის მიღების საშუალება“, - განმარტავს ვილი პაჭკორია.

„საქართველოს კლინიკების ასოციაციის“ პრეზიდენტი მიიჩნევს, რომ ქვეყანაში შექმნილი ვითარება ჯანდაცვის მინისტრის პასუხისმგებლობა. მისი თქმით, ქვეყანაში ეპიდემიოლოგიურმა მდგომარეობამ ახლა კულმინაციას მიაღწია რაზეც ეკატერინე ტიკარაძემ პასუხისმგებლობა უნდა აიღოს და თანამდებობიდან  გადადგეს.

„მიზეზი, თუ რატომ ვერ მართავს მინისტრი პროცესს არის ის, რომ მას არ აქვს სტაციონარული მენეჯმენტის ცოდნა. მინისტრს ასევე ევალება, რომ ზედმიწევნით იცოდეს კლინიცისტის საქმიანობა, არ არის სავალდებულო თვითონ იყოს კლინიცისტი, მაგრამ საქმიანობაში უნდა იყოს ჩახედული. გარდა იმისა, რომ საქმეშიც არაკომპეტენტურია, მას კოლეგებთან ურთიერთობის დიდი პრობლემა აქვს“, - განაცხადა ვილი პაჭკორიამ.

ვილი პაჭკორია ამბობს, რომ ჯანდაცვის სამინისტრო არაპროფესიონალებით არის  დაკომპლექტებული. „საქართველოს კლინიკების ასოციაციის“ პრეზიდენტის თქმით, სისტემა დღეს სწორედ ამ მიზეზის გამო ჩამოინგრა.

„ფაქტობრივად, მთელი ჯანდაცვის სამინისტრო დაწყებული, მინისტრის  მოადგილეებიდან, დამთავრებული სამსახურის უფროსებით და დეპარტამენტის  ხელმძღვანელობით,  აბსოლუტურად დისკვალიფიცირებულინი არიან, მოუმზადებლები, მოუმწიფებელნი თავიანთი, არაპროფესიონალებით. კარგად ვიცი ჯანდაცვის სამინისტროში ვინ რა წარსულით და გამოცდილებით ზის, აბსოლუტურად არ შეესაბამება მათი გამოცდილება თანამდებობებს და  სწორედ ამან ჩამოანგირა სისტემა“, - ამბობს ვილი პაჭკორია.

„კომერსანტის“ კითხვაზე  აქვს თუ არ ჰოსპიტალურ სექტორს რესურსი გაუმკლავდეს გაზრდილ ინფიცირებულთა რიცხვს პაჭკორია გვპასუხობს:

„ჰოსპიტალური სექტორში, თუ შენობა ნაგებობებს ვგულისხმობთ, საქართველოში არსებული კლინიკური ბაზები პაციენტთა მომსახურეობას ნამდვილად ეყოფა,  მაგრამ რაც შეეხება კადრებს, ამ კუთხით მნიშვნელოვანი პრობლემა წარმოიქმნება. პრობლემა წარმოიქმნება არა მხოლოდ ინფექციონისტებში, თერაპევტებში და რეანიმატოლოგებში, არამედ დამხმარე კადრებში, რომელთა კისერზე  გადადის მთელი შრომის 70 პროცენტი. ესენი არიან უფროსი მედდები, დამხმარე მედდები თუ სანიტრები“, — განმარტავს პაჭკორია.

„საქართველოს კლინიკების ასოციაციის“ პრეზიდენტის თქმით, სამომავლო პროგნოზი არა მარტო საქართველოში, არამედ მსოფლიო მასშტაბით ცუდია. მისივე განმარტებით, უარყოფითი პროგნოზი დამოკიდებულია არა მხოლოდ სახელმწიფოებრივ ქმედითუნარიანობაზე ან კვალიფიკაციაზე, არამედ ვირუსის აგრესიულ ფორმაზე. თუმცა ამბობს იმასაც, რომ ვირუსთან ბრძოლაში ერთ-ერთი გადამწყვეტი მნიშვნელობა კვალიფიციურ მენეჯმენტს აქვს.

„ვირუსი არის ვერაგი, მის მიერ დაზიანებული ქსოვილი, ნელა იკურნება და ამას ამძიმებს ის მდგომარეობა, რომ პრეპარატი ვირუსთან საბრძოლველად სამწუხაროდ ჯერ კიდევ არ არის. ვიცით, რომ რამდენიმე პრეპარატი კვლევაშია, პლუს პროცესს  ვაქცინა ვერ ეწევა, სწორედ ამან შექმნა მთავარი პრობლემა. როცა მკურნალობის  საშუალება და ვაქცინა არ არსებობს, ამას კიდევ თუ დაემატება მენეჯმენტის უცოდინრობა, ფაქტობრივად ასეთი ქვეყანა კატასტროფულ მდგომარეობამდე მივა. საბედნიეროდ ამ დონეზე არ ვართ, მაგრამ თუ საქმიანობა ასეთი მოუმზადებელი ჯანდაცვის პირობებში გაგრძელდება, რასაკვირველია შეიძლება  კატასტროფულ მდგომარეობამდეც კი მივიდეთ. მოლოდინი მაქვს, რომ მედიკამენტიც და ვაქცინაც მალე შეიქმნება და ჯანდაცვის მინისტრის იმედზე არ ვიქნებით“, — განაცხადა ვილი პაჭკორიამ.

სახელმწიფოს მუშაობის შეფასება კორონავირუსთან ბრძოლაში, უჭირს საქართველოს სამედიცინო ასოციაციების გაერთიანების აღმასრულებელი მდივანს არჩილ მორჩილაძეს. მისი თქმით, ასოციაციას კომუნიკაცია ჯანდაცვის სამინისტროსთან კორონავირუსის მიმართულებით არ აქვს. მორჩილაძე მთავრობის მხრიდან მეტი გამჭვირვალობას ელოდება.

„სანამ ამბავი არ დამთავრება შეფასება სუბიექტური იქნება, რადგან ჩვენ არ გვაქვს ინფორმაცია. როცა ყველაფერი დასრულდება პოსტ ფაქტუმ უნდა გავაკეთოთ თუ რამდენად კარგად იმუშავა საქართველოს მთავრობამ, კომუნიკაცია ჩვენ გაერთიანებას ჯანდაცვის სამინისტროსთან კორონავირუსის მიმართულებით არ აქვს. ამ ეტაპზე მე რასაც ვისურვებდი არის, ის რომ როცა აცხადებენ, დაინფიცირებულების რიცხვს იქვე თქვან რამდენი ტესტი გაკეთდა. ამით მივხვდებით დაახლოებით როგორ არის გავრცელება. გვაქვს თუ არა საკმარისი საწოლ ფონდი? არ ვიცით, ამბობენ, რომ აქვთ.  ამიტომ მეტ გამჭვირვალობას ვისურვებდი“. - განაცხადა არჩილ მორჩილაძე.

ბაჩო ადამია