დეპოლარიზაციას მიაღწიეთო გვითხრეს ევროპელებმა თუ კანდიატის სტატუსი გინდათო და დღეს ამის საპირისპირო მაგალითი ვიხილეთ პარლამენტში, სადაც პარლამენტის პლენარულ სხდომაზე პრემიერ-მინისტრ ირაკლი ღარიბაშვილი სამთავრობო პროგრამის შესრულების ანგარიშს წარადგენს. სხდომა ხმაურით დაიწყო და შემდეგაც ერთმანეთის შეურაცხყოფით გაგრძელდა. 

ოპოზიციონერი დეპუტატების ხმაური გამოიწვია ირაკლი ღარიბაშვილის სიტყვის დასაწყისმა, როდესაც მან თქვა, რომ 17 ივნისს ევროკომისიამ ისტორიული გადაწყვეტილება მიიღო და გაჩნდა ნანატრი ჩანაწერი“. ფრაქცია „ნაციონალური მოძრაობის“ თავმჯდომარემ, ხატია დეკანოიძემ, ირაკლი ღარიბაშვილს სხდომათა დარბაზიდან „მოღალატე“ და „მონა“ უწოდა.

„წამალი არ გაქვთ? წამალი მიუტანეთ, დაამშვიდეთ... ტყუილებს, არა, ყველაფერს სიმართლეს გეტყვით თქვენც და ყველას. ექიმს ხომ არ დავუძახოთ?“ - ასე გამოეხმაურა საპარლამენტო ტრიბუნიდან პრემიერ-მინისტრი ხატია დეკანოიძის რეპლიკებს.

დარბაზის იძულებით დატოვებით დაემუქრა პარლამენტის თავმჯდომარე შალვა პაპუაშვილი ოპოზიციონერ დეპუტატს, ანი წითლიძესაც, როდესაც ის სხდომათა დარბაზიდან მიკროფონის გარეშე მიმართავდა ირაკლი ღარიბაშვილს, რის გამოც პრემიერ-მინისტრმა სიტყვის გაგრძელება რამდენიმე წუთის განმავლობაში ვერ შეძლო.  „თქვენ ხართ მოღალატეების პარტია, თქვენ ხართ მოღალატეების პარტია... არა, მოგისმენთ“, - ამ რეპლიკით გამოეხმაურა ირაკლი ღარიბაშვილი ანი წითლიძის შეძახილებს დარბაზიდან.

პრემიერმა მოღალატე უწოდა სალომე სამადაშვილსაც, რომელიც, ღარიბაშვილის თქმით „დადიოდა პირადად ბრიუსელში და სთხოვდა, რომ არ მისცეთ კანდიდატის სტატუსი საქართველოსო. იცნობდეთ ქვეყნის მოღალატეს! რა თქმა უნდა, ჩვენ ჩვენი ევროპელი მმართველების გადაწყვეტილებაა, მათი ეს გონიერება, რომელიც გამოვლინდა, სწორედ, ამ ევროპული პერსპექტივის ჩაწერით არის მისასალმებელი და ჩვენ ეს ყველას გვახარებს, - განაცხადა პრემიერმა.

ასევე დაძაბულობა მოჰყვა პრემიერის გამოსვლის იმ ნაწილს, სადაც ის უკრაინაში მიმდინარე ომის ფონზე, რუსეთის მიმართ სანქციების დაწესების შესახებ საუბრობდა: „დღეს რა ნამუსით გველაპარაკებით, სანქციებს რატომ არ უერთდებითო. მე მინდა მათ [ოპოზიციას] ყველაფერი შევახსენო, მოსწონთ, თუ არ მოსწონთ, უნდა მოითმინონ და მოისმინონ ბოლომდე მათი დანაშაულებები. დღეს ჩვენ მოგვიწოდებენ, სანქციებს რატომ არ შეუერთდითო. რატომ არ დავუწესეთ ეკონომიკური სანქციები ხალხს. ეს ხომ ამას ნიშნავს, ფაქტობრივად. მე მინდა კითხვა დავუსვა ძვირფას ოპონენტებს, ომის შემდეგ თქვენ რა გააკეთეთ, რომ სანქციები დაგეწესებინათ რუსეთისთვის? ნული, არაფერი. არავითარი აქტივობა მათი მხრიდან მსოფლიოში ჩვენ არ გვინახავს. პირიქით, მათ კაპიტულანტურ რეზოლუციას მოაწერეს ხელი. რუსულ სახელმწიფო კომპანიებს მიყიდეს სტრატეგიული აქტივები, ენერგეტიკული ობიექტები“.

პრემიერ-მინისტრის ამ განცხადებას, დარბაზში ოპოზიციონერი დეპუტატების ხმაური მოჰყვა, რასაც ირაკლი ღარიბაშვილი ასე გამოეხმაურა: „ნუ ყვირიხარ, კაცო, აკო, აკუნა, ნუ არტისტობ, წყნარად იყავი. ათეულობით ენერგეტიკული ობიექტი მიყიდეთ და კარგად იცით“... „აუ, ეს წასაყვანია საავადმყოფოში... ამის შემდეგ, ცალმხრივად, თქვენმა გუნდმა, სააკაშვილმა, დაუწესა უვიზო რეჟიმი მოქალაქეებს... და პირადად მივიდა ეს მანიაკი, მასხარა კაცი, სააკაშვილი, საზღვარზე და პირადად ხვდებოდა რუს ტურისტებს ომის შემდეგ. დღეს ესენი მოგვიწოდებენ ჩვენ, რომ სანქციები დავუწესოთ რუსეთს, რუსეთს კი არა, საკუთარ თავს, მეგობრებო“... „ხაბეიშვილო, შენ და ყველანი, თქვენ წარმოადგენთ მოღალატეების პარტიას სააკაშვილის ლიდერობით, თქვენ ხართ მოღალატეები“.