„მოდის, ხელოვნების და დიზაინის პირველი სკოლა საქართველოში 2022 წელს გაიხსნება“, - ამის შესახებ მერსედეს-ბენცის მოდის კვირეულის დამფუძნებელმა და შემოქმედებითმა ხელმძღვანელმა განაცხადა. სოფო ჭყონიამ პირველი არხის ეთერში ახალი მასშტაბური პროექტის შესახებ ისაუბრა, რომელიც „კოკა-კოლას“ ყოფილი ქარხნის სივრცეში განთავსდება.
მისი თქმით, პროექტში უკვე საკმაოდ დიდი ინვესტიცია ჩაიდო, თავდაპირველად ადგილობრივი კაპიტალი, თუმცა სოფო ჭყონია ამბობს, რომ განვითარების შემდეგი ეტაპისთვის პროექტს პირად რესურსზე ბევრად მეტი სჭირდება, ამიტომ მულტიფუნქციური სკოლის პროექტი ძირითადად უცხოური ინვესტიციით განხორციელდება. მერსედეს-ბენცის მოდის კვირეულის დამფუძნებლის განცხადებით, სტუდენტები მოდის სფეროებში საფუძვლიანი ცოდნის მიღებას შეძლებენ.
„ხელოვნებისა და დიზაინის სკოლა 2022 წელს გაიხსნება და მორგებული იქნება იმ საჭიროებებზე, რომელიც საქართველოში მოდის ინდუსტრიაში გვაქვს, საჭიროება კი ყველაფრის გვაქვს. ვისაც მოდის სფეროში უნდა მუშაობა, ყველა დიზაინერი არ უნდა გამოვიდეს. არის ძალიან ბევრი პროფესიები და ამ პროფესიებს ნელ-ნელა შემოვიტანთ“, - ამბობს სოფო ჭყონია.
მისივე თქმით, სკოლა საერთაშორისო დონეზე დაიწყებს ფუნქციონირებას, სადაც სწავლა მხოლოდ ინგლისურ ენაზე იქნება შესაძლებელი. მერსედეს-ბენცის მოდის კვირეულის დამფუძნებელს სურვილი აქვს, რომ მოდისა და დიზაინის წამყვანი პროფესიონალები სხვადასხვა ქვეყნიდან ჩამოიყვანოს. მისი თქმით, მოდის, ხელოვნებისა და დიზაინის სკოლაში სწავლა ისეთი ძვირი არ იქნება, როგორც სხვა ქვეყნებში, თუმცა საქართველოში იქნება ისეთი სკოლა, როგორებიც ევროპაშია.
„ძალიან ბევრი პროექტი გვაქვს. მულტიფუნქციურ სივრცეში მოეწყობა სტუდიები, რადგან გვინდა, რომ კინოს მიმართულებითაც განვვითარდეთ. ასევე იქნება ძალიან ბევრი სამუშაო სივრცე. ეს ადგილი იდეალური იქნება ფესტივალებისთვისაც. იქნება სივრცე, რომელიც შეიძლება გამოფენებისთვის და სხვადსხვა ტიპის ღონისძიებებისთვის გამოვიყენოთ. გარდა ამის, ჩვენი მთავრი მიზანია მთელი მსოფლიოდან მოვიზიდოთ ადამიანები, რომელთაც ყველა ინდუსტრიაში აქვთ გავლენა, რათა ადგილობრივ შემოქმედ ადამიანებს დავაკავშიროთ“, - განაცხადა სოფო ჭყონიამ.