ერთთვიანი მკვეთრი გამყარების შემდეგ ახალი კვირა ლარმა მცირედი გაუფასურებით დაიწყო. Bloomberg-ის პლატფორმაზე ვაჭრობა 3.1500 ნიშნულით დაიწყო და თბილისის დროით 12:30-ზე 3.1650-ს მიაღწია. პარასკევს გამოცხადებული ორშაბათის ოფიციალური კურსი კი 3.0791-ს შეადგენს.
1 თვის წინ აშშ დოლარი 3.4430 ღირდა. მაისის მეორე ნახევარსა და ივნისის პირველ კვირაში, ეროვნული ვალუტა 36.4 თეთრით გამყარდა, რაც 11.6%-იან გამყარებას ნიშნავს, რის შემდეგადაც კურსი 2020 წლის სექტემბრის დასაწყისის მაჩვენებელს დაუბრუნდა.
მკვეთრი გამყარების მიზეზად რამდენიმე ფაქტორი დასახელდა: 1) კოვიდრეგულაციების შერბილება; 2) ტურიზმის მცირედი აღდგენა; 3) მონეტარული პოლიტიკის გამკაცრება; 4) მოლოდინები.
ბოლო ერთ თვეში კომენდანტის საათმა 21:00 სთ-დან 23:00 სთ-მდე გადაინაცვლა. რესტორნებს შაბათ-კვირას მუშაიბის უფლება მიეცათ. მაისის სტატისტიკა არ დადებულა, მაგრამ აპრილში ვიზიტორების რაოდენობა გასული წლის სრულ ვარდნასთან შედარებით 140%-ით გაიზარდა. 28 აპრილს რეფინანსირების განაკვეთი 1%-ით 9.5%-მდე გაიზარდა, რისი ეფექტიც მაისში გამოჩნდა, თავად რეფინანსირების სესხის მოცულობა კი 3 მლრდ ლარიდან 980 მლნ-მდე შემცირდა.
პარასკევს ბლუმბერგზე მიმდინარე კურსი დროის მცირე მონაკვეთში 3.05-მდეც შემცირდა, მაგრამ შემდეგ ისევ 3.15-მდე გაუფასურდა.
ლარის გამყარებას ფასებზე გავლენა არ მოუხდენია. მაისში ოფიციალურმა ინფლაციამ 7.7%-ს მიაღწია. საქსტატს ფქვილზე და ელექტროენერგიაზე სუბსიდირება ფასის შენარჩუნებად კი არა გაძვირებად რომ ჩაეთვალა ინფლაცია ორნიშნა მაჩვენებლს მიაუხლოვდებოდა.