იმ ფონზე, როდესაც არჩევნების გაყალბების მტკიცებულება არ არსებობს, არც ასეთ კრიზისს აქვს არსებობის საფუძველი და არც ვადამდელი არჩევნების ჩატარების მოთხოვნას, – ამის შესახებ ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.
მისივე თქმით, მოლაპარაკების პროცესში წარმატებისთვის ხელისშემშლელი მიზეზი ოპოზიციის მხარეს უნდა ვეძებოთ.
„კატეგორიულად არ ვეთანხმებით პოლიტიკურ პატიმრობასთან დაკავშირებულ საკითხს და არც უმიზეზოდ ვადამდელი არჩევნების დანიშვნა არის გონივრული გადაწყვეტილება. ეს ნამდვილად არ ემსახურება ჩვენი ქვეყნის რეალურ ინტერესებს. კრიზისი, რომელზეც დღეს არის საუბარი, შექმნილია ერთადერთი მოტივით – დაუმორჩილებლობით და პარლამენტში შესვლაზე უარის გაცხადებით იმ მოტივით, თითქოს არჩევნები გაყალბდა. იმ ფონზე, როდესაც არავითარი მტკიცებულება არ არსებობს, რომ არჩევნები გაყალბდა, არც ასეთ კრიზისს აქვს არსებობის საფუძველი და არც ვადამდელი არჩევნების ჩატარების მოთხოვნას.
ოპოზიციის მხრიდან პრაქტიკულად ულტიმატუმი იყო დაყენებული, რომ ეს ორი მოთხოვნა თუ არ დაკმაყოფილდება, სხვა არაფერზე ვსაუბრობთ. სწორედ ეს არის დესტრუქციული დამოკიდებულება მოლაპარაკების პროცესისადმი. მოლაპარაკებების შედეგიანად წარმართვისთვის ხელშემშლელი მიზეზი თუ არსებობს, ეს მიზეზი უნდა ვეძიოთ სწორედ ოპოზიციის მხარეს. კონსტრუქციულობა გულისხმობს პირველ რიგში, ერთმანეთის მოსმენას და სამართლიან პირობებზე შეთანხმებას“, – განაცხადა სარჯველაძემ.
სარჯველაძის თქმით, მოლაპარაკების პროცესში ყველა მხარემ საკუთარი პასუხისმგებლობა უნდა გაიაზროს და თავის თავზე აიღოს.
„მოლოდინი, როგორიც არ უნდა იყოს, აქ მნიშვნელოვანია ჩვენი მზადყოფნა, აქტიურად ვიყოთ ჩართული მოლაპარაკების პროცესში და განწყობილი ვიყოთ, შედეგიანად დასრულდეს. რაც შეეხება პასუხისმგებლობას, ის, რაც ჩვენი დაშავებულია, პასუხისმგებლობას რა თქმა უნდა, ავიღებთ, მაგრამ ის, რაც ჩვენი ბრალი არ არის და ჩვენგან დამოუკიდებლად ხდება, ოპოზიციის დესტრუქციას ვგულისხმობ, ამაზე პასუხისმგებლობა უპირველესად უნდა აიღოს იმ პოლიტიკურმა ძალამ, რომელიც ამის შემოქმედია“, – განაცხადა სარჯველაძემ.
1tv.ge