გუდაურში ხუთი დღე არ არის წყალი და ესენი ქეიფობენ მცხეთაში, – ამის შესახებ საქართველოს ყოფილი პრეზიდენტი მიხეილ სააკაშვილი სოციალური ქსელით გავრცელებულ ვიდეოში საუბრობს, რომელიც საქართველოს კურორტებზე წყალმომარაგების პრობლემას შეეხება.
მიხეილ სააკაშვილის თქმით, შექმნილი ვითარებით საქართველოს კურორტებისთვის პერსპექტივა იკარგება.
„გუდაურში ხუთი დღე არ არის წყალი და ესენი ქეიფობენ მცხეთაში. ამ დროს მე დავყრიდი ყველაფერს, გავიქცეოდი, წავიყვანდი იქ მთელ მთავრობას და გავაკეთებდით ყველაფერს ზუსტად ერთ საათში. არადა ახლა, ამ წუთას, იკარგება არა მხოლოდ შემოსავლები, არამედ პერსპექტივები ჩვენი კურორტებისთვის.
ბაკურიანში წყალი თითქმის არავის არა აქვს, გარდა გამგებლის პირადი სასტუმროსი. გაჩერდა ის პროექტები, რომელიც მე დავიწყე. სვანეთში მე ავაშენე კურშაველის სიდიდის სათხილამურო კურორტი, რომელიც იქნებოდა ყველაზე დიდი ევროპაში, როგორც მინიმუმ. უზარმაზარი რეკლამა გავაკეთეთ, საბაგიროები გავაკეთეთ . გააჩერეს გზები, გააჩერეს კორუფციის გამო, ივანიშვილის პირადი ბოღმის გამო. არადა, სადაც არის მთის კურორტები, იქ შეუძლებელია ხალხი იყოს ღარიბი – არც სვანეთში, არც მაღალმთიან აჭარაში, სადაც ასევე გაჩერდა განვითარება, არც გუდაურში, არც ბაკურიანში. ყველგან, სადაც არის სათხილამურო ტრასები, ხალხს აქვს მაღალი შემოსავალი და ხალხი მდიდრდება. ჩემი გათვლებით, 2019 წლისთვის, 2012 წელთან შედარებით რვაჯერ უნდა გაზრდილიყო სათხილამურო კურორტებზე ჩამოსულთა რაოდენობა. ახლა ძალიან ცოტა ზრდა არის. ამ ყველაფერზე პასუხისმგებლობა პირადად ივანიშვილს ეკისრება, რომელსაც პირადი ბოღმისა და სიხარბის გამო უნდა ფასი დაუგდოს ამ კურორტებს და მერე ყველაფერი ჩაიდოს ჯიბეში. სასწრაფოდ არის ყველაფერი შესაცვლელი და ინფრასტრუქტურა არის მოსაწესრიგებელი. წინააღმდეგ შემთხვევაში, ვკარგავთ შემოსავალს და პერსპექტივას. ლამის შემოსავლის ბოლო წყაროს ვკარგავთ ჩვენი ეკონომიკისთვის“, – განაცხადა მიხეილ სააკაშვილმა.
1tv