დისციპლინას აქვს თავისი დადებითი მხარეები, მაგრამ პედაგოგიკის ხელოვნება ისაა, რომ მოინახოს სწორი ბალანსი დისციპლინასა და თამაშ-თამაშით სწავლას შორის, - ამის შესახებ გადაცემაში „SWOT ანალიზი“ განათლების, მეცნიერების, კულტურისა და სპორტის მინისტრმა, მიხეილ ჩხენკელმა განაცხადა.

„განათლების ხარისხი დამოკიდებულია სამ მთავარ ფაქტორზე: ეს არის მასწავლებელი, პროგრამა და ინფრასტრუქტურა. აქედან მასწავლებელი არის მთავარი პიროვნება, რომლის მოღვაწეობაზეც არის დამოკიდებული განათლების ხარისხი. შესაბამისად, მთავარი აქცენტი გვაქვს გაკეთებული სკოლის მოსწავლეების საფუძვლიან მომზადებაზე. ჩვენ გვაქვს მასწავლებლის სახლი, სადაც ისინი ტრენინგებს გადიან. საქართველოში მოღვაწე ყველა მასწავლებელს მიეცემა შანსი, რომ საგრძნობლად აიმაღლონ კვალიფიკაცია. ამ ტრენინგების დროს აქცენტი გაკეთდება პედაგოგიურ უნარ-ჩვევებზე, რომლებიც მათ უნდა მიიტანონ საკლასო ოთახში“, - აღნიშნა მიხეილ ჩხენკელმა.

მისივე თქმით, დისციპლინას აქვს თავისი დადებითი მხარეები, მაგრამ პედაგოგიკის ხელოვნება ისაა, რომ მოინახოს სწორი ბალანსი დისციპლინასა და თამაშ-თამაშით სწავლას შორის.

„კვლევები აჩვენებს, რომ თამაშ-თამაშით სწავლას აქვს თავისი ეფექტი. როდესაც Microsoft-მა დაინახა, რამდენად პოპულარულია კომპიუტერული თამაში Minecraft-ი, მათ ამის ბაზაზე საგანმანათლებლო პროდუქტი შექმნეს. ჩვენ გვქონდა მოლაპარაკებები ძალიან მაღალ დონეზე Microsoft-ის წარმომადგენლებთან და სექტემბრიდან ამას დავნერგავთ პილოტირების რეჟიმში“, - განაცხადა განათლების მინისტრმა.

imedinews.ge