შვედური ავეჯის გიგანტი, Ikea ფასების გაზრდას აპირებს, რადგან კომპანიაში პროგნოზირებენ, რომ მიწოდების ჯაჭვის გლობალური შეფერხება მომავალ წელსაც გაგრძელდება. Reuters-ის მიერ გავრცელებულ განცხადებაში Ikea-მ წლიური მოგების ვარდნა დააფიქსირა, რის მიზეზადაც ტრანსპორტისა და ნედლეულის მაღალი ხარჯები დაასახელა.

„მომავალ წელს კომპანია ამ ხარჯების ნაწილს თავის მაღაზიებზე გადაანაწილებს, რის გამოც ეს მაღაზიები მომხმარებლებს მეტის გადახდას მოთხოვენს,“ - წერს Reuters.

Ikea Group-მა, რომელსაც შემოსავალი, ძირითადად, ფრენჩაიზებზე თავისი პროდუქციის მიყიდვით შესდის, განაცხადა, რომ სექტემბრამდე პერიოდში გადასახადამდელი წლიური მოგება 16%-ით, 1,7 მლრდ ევრომდე შეუმცირდა, ხოლო პანდემიამდელ, 2019 წელთან შედარებით, მოგება 4%-ით შემცირდა.

„კომპანიის შემოსავლებს ყველაზე დიდი დარტყმა საფინანსო წლის მეორე ნახევარში ტრანსპორტსა და ნედლეულზე ფასების მკვეთრმა ზრდამ მიაყენა. მაღაზიებსა და საწყობებში მარაგის შენარჩუნება ჩვენთვის გამოწვევა იყო. მიწოდების ჯაჭვის შეფერხებამ გამოიწვია პროდუქციის ხელმისაწვდომობის მნიშვნელოვანი ვარდნა, საიდანაც ჯერ არ გამოვსულვართ. ჩვენ ველით, რომ ეს 2022 ფისკალურ წელსაც გაგრძელდება," - ნათქვამია კომპანიის განცხადებაში.

მთავარი ფინანსური დირექტორის, მარტინ ვან დამის თქმით, მიწოდების ჯაჭვის გლობალური კრიზისისა და ენერგომატარებლებზე მაღალი ფასების შედეგები შესაძლოა, გარკვეული დროით გაგრძელდეს და „2022 წელი შედარებით მეტი გამოწვევით უფრო რთული წელი იყოს.“

Ikea-მ წლის განმავლობაში, სექტემბრამდე საცალო მოვაჭრეებისთვის თავის პროდუქციაზე ფასები არ გაზარდა, მაგრამ კომპანია ახლა უკვე აცხადებს, რომ მიმდინარე ფისკალურ წელს ნედლეულსა და ტრანსპორტირებაზე გარკვეულ დიდ ხარჯებს მაღაზიების მფლობელებს გადააბარებს.

„ამ რთულ პირობებში საცალო ვაჭრობისთვის ფიქსირებული ფასების უზრუნველყოფას ვერ გავაგრძელებთ. ჩვენ, ასევე, 2022 ფისკალური წლის განმავლობაში გაზრდილი ხარჯების მხოლოდ ნაწილის ათვისებას ვგეგმავთ,“ - ნათქვამია კომპანიის განცხადებაში.

მარტინ ვან დამი ამბობს, რომ მაღაზიის მფლობელებს ექნებათ გარკვეული თავისუფლება, რათა გადაწყვიტონ, გაზრდიან თუ არა, ან რამდენად გაზრდიან ფასებს მყიდველებისთვის.

ოქტომბრის შუა რიცხვებში Ikea-ს აღმასრულებელი დირექტორი, ჯესპერ ბროდინი აცხადებდა, რომ პორტების გადატვირთულობა მიწოდების პრობლემებს იწვევს.

„ასეთი უწესრიგო ცხოვრება მომავალ წელსაც მოგვიწევს,” - ამბობდა მაშინ ბროდინი.

პროდუქციის დეფიციტთან გასამკლავებლად Ikea იძულებული გახდა, გადაზიდვის დამატებითი საშუალებები შეეძინა.

bpn.ge