პანდემიის დროს საქართველოში დახურულმა სავაჭრო ობიექტებმა და დაწესებულებებმა ეკონომიკური კრიზისკენ დაჩქარებული სვლის დასაწყისი შექმნა.  ეკონომიკურ კრიზისზე უსახსროდ  დარჩენილი მოსახლეობაც მეტყველებს.მსოფლიოში ეკონომიკური კრიზისის დაწყებას გაეროს კვლევაც ადასტურებს, სადაც ნათლად ჩანს, რომ ბოლო 30 წლის განმავლობაში გლობალური სიღარიბის მაჩვენებლის ზრდის პირველი შემთხვევა იქნება.

პანდემიის დასრულების დროს დედამიწის 7.8-მილიარდიანი მოსახლეობის ნახევარი, შესაძლოა სიღარიბეში ცხოვრობდეს.

გაეროს დასკვნას ეთანხმება  მაჟორიტარი დეპუტატი კახაბერ ოქრიაშვილი და აცხადებს, რომ  კორონავირუსის პანდემიით გამოწვეული ეკონომიკური შედეგი საქართველოსთვისაც მძიმე იქნება .დეპუტატის თქმით, სიღარიბეში მცხოვრები ადამიანების რაოდენობა გაიზრდება, თუმცა, ამ სიღარიბიდან ქვეყანა კონკრეტული გეგმის დახმარებით უნდა ამოვიდეს.  

„გაერო და მისი კვლევები არც გვჭირდება იმის დასადგენად, რომ კორონავირუსის შემდეგ ბევრი ადამიანი გაღარიბდება. ეკონომიკა გაჩერებულია, ისედაც ღარიბი ქვეყანა ვართ და უფრო გავღარიბდებით. ყველაფერი გაჩერებულია ერთეული კომპანიების გარდა, შიდა პროდუქტი არ იქმნება.ისედაც მყიფე ეკონომიკა ვაჭრობაზე და ტურზმზე იყო დამოკიდებული და მთლიანად გაუქმდა ეს საკითხი. არ მინდა პესიმისტი ვიყო, თუმცა, მძიმე პერიოდი გველოდება წინ.“-ამბობს კახაბერ ოქრიაშვილი.

მაჟორიტარი დეპუტატი არსებული ვითარების დროს ოპტიმისტურ საკითხად პარტნიორი ქვეყნების დახმარებას მიიჩნევს და აცხადებს, რომ მათგან მიღებული თანხა ქვეყანაში გონივრულად უნდა განაწილდეს.

„ოპტიმისტური თემა ის არის, რომ ჩვენი პარტნიორი ქვეყნები ფინანსურად გვეხმარებიან, მაგრამ ეს თანხა არ უნდა შევჭამოთ და რეალური წარმოების სერიოზული კლასტერები უნდა გავაჩინოთ, რომელიც როგორც შიდა მოხმარებას მოემსახურება, ისე ექსპორტზეც გავა და  დამატებით თანხებს შემოიტანს .სადაც შეგვიძლია, რომ ჩვენ ჩვენი თავი დავაკმაყოფილოთ, ყველა კომპონენტი უნდა იყოს შესწავლილი და მასზე ვიმუშაოთ.“-აღნიშნა ოქრიაშვილმა.

„კომერსანტის“ კითხვაზე, იდგმება თუ არა კორონავისურის პერიოდში სწორი ნაბუჯები, იმისთვის, რომ ქვეყანამ სამომავლოდ კრიზისი არ განიცადოს კახაბერ ოქრიაშვილი პასუხობს, რომ ამ კონკრეტული შემთხვევების  დროს, რაც კორონავირუსს უკავშირდება მთავრობის ყველა გადაწყვეტილება იყო ზუსტი და დროული.

„90-იანი წლებიდან დაწყებული ყველა მთავრობას პრობლემა ჰქონდა, მათ შორის, „ქართული ოცნების“ მთავრობებსაც, მაგრამ ახლა covid-19-ის  პრობლემა დადგა, ვიტყოდი რომ კარგად უმკლავდებიან ყველაფერს. ჯერჯერობით ნდობას ვუცხადებ მთავრობის ყველა გადაწყვეტილებას, რაც გიორგი გახარიამ გააკეთა ყველა ნაბიჯი იყო დაბალანსებული, დროული და  სწორი.მიუხედავად მთავრობის ამ  მცდელობისა, ჩვენ ისედაც ღარიბი ერი ვართ და კიდევ უფრო დიდი შანსია, რომ გავღარიბდეთ.თუმცა, ეს იმას არ ნიშნავს, რომ ხელი არ გავანძრიოთ და უქმად ვისხდეთ. პირიქით, ეს ჩვენთვის უნდა იყოს მოტივაცია, ბიძგი რომ უფრო შემართებით ვაკეთოთ საქმე.

ზოგი ადამიანი უბრალოდ უქნრაა და ასე არაფერი გამოვა. ყველამ ჩვენი წვლილი უნდა შევიტანოთ გადარჩენისთვის, თუნდაც, მცირედით და ამ მცირედში ვგულისხმობ იმ საკარმიდამო მეურნეობას, რომელიც ბევრს მიტოვებული აქვს და ფუნქცია დაუკარგეს. ისტორიას გადავხედოთ, როდესაც ძალიან გვიჭირდა უფრო მაგრად ვიბრძოდით. დალხენილი  ქართველი  ჩვენი დიდი პრობლემაა.“-ამბობს ოქრიაშვილი.

ნათია ლომიძე