„ ამ ზამთარს ბევრი ბიზნესი ვერ გადაიტანს, ბევრი უკვე იხურება და ასევე ბევრი ადამიანი დარჩება უმუშევარი. მინიმუმ 6 თვიანი შეღავათებია საჭირო. ასევე, ქონების გადასახადი უნდა დაპაუზდეს. ეს ყველაფერი რეალობაში რომ ვაქციოთ, პირველ რიგში, კომუნიკაცია უნდა აღდგეს, რომელიც არ არსებობს,“ - შეღავათები, კომუნიკაციის ნაკლებობა, კადრების შენარჩუნებაში ხელშეწყობა - რას სთხოვს ბიზნესი სახელმწიფოს და როგორ შეძლებს ეპიდსიტუაციასთან გამკლავებას კერძო სექტორი?  „კომერსანტი“ ბიზნეს სექტორის წარმომადგენლების პოზიციით დაინტერესდა კითხვაზე - რომელია ის პირველი და აუცილებელი 3 ნაბიჯი, რაც ახლა მთავრობამ უნდა გადადგას მეორე ტალღის უმძიმესი ფინანსური შედეგების თავიდან ასარიდებლად? – ICR ჯგუფის დამფუძნებლის კახა ხაზარაძის მიერ ბიზნეს სექტორისთვის გამოწერილი „დანიშნულება“ ასეთია - მეტი კომუნიკაცია, საბაჟო დაბეგვრასთან დაკავშირებული შეღავათი და საშემოსავლო შეღავათების მინიმუმ 6 თვით გახანგრძლივება.

„მიუხედავად იმისა,რომ დაგვიანებულია, რა შეიძლება მთავრობამ ბიზნესისთვის გააკეთოს?

პირველი პრობლემა ის არის, რომ ის კომუნიკაცია რაც დღესაა ბიზნესსა და მთავრობას შორის, ფასადურია, ვინაიდან არ ხდება რეალობის გაზიარება და საერთო პრობლემატიკაზე საუბარი. დავიწყეთ საუბარი მარტში, მაგრამ დღემდე ისე მოვედით, რომ არანაირი ქმედება, კომუნიკაციის ნაწილში არ შემდგარა. როცა კომუნიკაცია არ გაქვს ბიზნესთან, ეს ნიშნავს, რომ მაგარი ხარ და იცი, როგორ მართო სიტუაცია, მაგრამ სახეზე გვაქვს,რომ - როგორც პანდემიის მართვაში, ისე ბიზნეს-მენეჯმენტშიც კრიზისია.

მეორე -  იმ სფეროსთვის, რომელსაც მე წარმოვადგენ, მნიშვნელოვანი მოთხოვნა რაც მარტში გვქონდა, იგივეს ვაყენებთ ახლაც, რომ დღგ საბაჟოდან იქნეს გადატანილი რეალიზაცია,რაც მინიმუმ ამოსუნთქვის საშუალებას მისცემს ბიზნესს. მაშინაც უარი თქვეს და არ მგონია, რომ ახლა მაინც გაიზიარონ.

მესამე არის ის, რომ ადამიანების შენარჩუნებისთვის გაგრძელდეს ის შეღავათები, რამაც მოგვცა საშუალება დაგვეტოვებინა პერსონალის 90%.  საშემოსავლო გადასახადთან დაკავშირებული შეღავათები მინიმუმ 6 თვის განმავლობაში მაინც უნდა გაგრძელდეს.  მერე გაზაფხულს შევხედავთ და არსებული სიტუაციიდან გამომდინარე მივიღებთ გადაწყვეტილებას.  

როცა ამდენი პრობლემა გაქვს, მიზეზი საკუთარ თავში უნდა ეძებო - ქვეყანაში ინვესტიციები არ შემოედინება, პოლიტიკური კრიზისია, სასამართლო ფაქტობრივად არ არსებობს. არის ის პრობლემები,რომლებიც ბიზნესს აწუხებს დღეს. აღარ ვსაუბრობ ლარზე და მის დევალვაციაზე. ერთი პრობლემა და ერთი მიზეზი არ არსებობს, მთელი კოქტეილი გვაქვს,“- განმარტავს კახა ხაზარაძე.

ცნობისთვის, „აი სი არ ჯგუფი“ ფეხსაცმლის, ტანსაცმლის, აქსესუარების, ავეჯის 80-მდე საერთაშორისო ბრენდს, კვების ობიექტებს და 400-მდე მაღაზიას აერთიანებს.

მარიამ მორგოშია