„მიუხედავად იმისა, რომ თითოეული დახურული თვე „ისთ ფოინთისთვის“ უდიდესი ზარალია, ვფიქრობთ, რომ ეს არის ერთადერთი გამოსავალი პანდემიის შეჩერებისთვის“, - ამის შესახებ კომერსანტს „ისთ ფოინთის“ მარკეტინგის დირექტორმა თეიკო ლომინაძემ განუცხადა. მისი თქმით, კომპანია საქართველოში კორონავირუსის გავრცელების პირველივე დღიდან მთავრობის ინსტრუქციას მკაცრად მიჰყვება. როგორც თეიკო ლომინაძემ ამბობს „ისთ ფოინთის“ მენეჯმენტი თითოეულ პარტნიორთან ერთად ცდილობს შეიმუშავოს ის გეგმა, რომელიც მათ ზარალის შემცირებაში დაეხმარებათ. „ისთ ფოინთის“ მარკეტინგის დირექტორი აცხადებს, რომ სავაჭრო ცენტრი იმ ნიშნულზე დაბრუნებას, რომელიც პანდემიის დაწყებამდე ჰქონდა გარკვეული დროის გავლის შემდეგ შეძლებს. კადრის შენარჩუნება კი 100 პროცენტით მოხერხდა.
„ყოველთვიური ზარალი რომელიც „ისთ ფოინთზე“ უხეშად, რომ ვთქვათ ბოქლომის დადებით მივიღეთ, ძალიან დიდია, კონკრეტულ ციფრებს წლის ბოლოს დავითვლით. ჩვენ ისიც გაანალიზებული გვაქვს, რომ რითეილერები საკმაოდ რთულ მდგომარეობაში იქნებიან, შესაბამისად, მჭიდროდ ვთანამშრომლობთ მათთან, რათა ამ სიტუაციიდან გამოსავალი ერთად ვნახოთ, რაც გულისხმობს რა თქმა უნდა იჯარის ნაწილს.ვფიქრობ, რომ ჩვენი დიდი მხარდაჭერით ისინი შეძლებენ გამოძვრნენ ამ სიტუაციიდან. რა თქმა უნდა გვაქვს ანტიკრიზისული გეგმა, თუმცა, ანტიკრიზისული გეგმა არ შეხებია თანამშრომლების შემცირებას. მოვიქეცით ისე, როგორც კანონითაა გათვალისწინებულია, „ისთ ფოინთის“ დახურვის შემდეგ კომპანიამ ორი თვით აიღო ვალდებულება თანამშრომლებს ხელფასები გადაუხადოს, ორ თვის შემდეგ კი სავაჭრო ცენტი გაიხსენება კიდეც“, - განმარტავს თეიკო ლომინაძე.
„კომერსანტის“ კითხვაზე სწორად მოქმედებს თუ არა საქართველოს მთავრობა, „ისთ ფოინთის“ მარკეტინგის დირექტორის პასუხი შემდეგია:
„პოლიტიკური განცხადებების გაკეთება არ იქნება ჩვენი მხრიდან სწორი. არავინ იცის სწორი და არასწორი რა არის გამომდინარე იქედან, რომ ყველანი პირველად ვართ ამ სიტუაციაში, ვხედავთ ქვეყნებს სადაც ეკონომიკა გაიხსნა, მაგრამ ვხედავთ ქვეყნებს, სადაც ამ დრომდე შეზღუდულია გარკვეული საქმიანობები. მაგალითად, დანია, რომელმაც სამი თვით დახურა სავაჭრო მოლები. ასე რომ შეიძლება ჩვენ ჩვენი მოსაზრებები გამოვთქვათ, მაგრამ არავინ არ იცის დღეს რომელი გადაწყვეტილებაა სწორი და რომელი არასწორი“, - განაცხადა თეიკო ლომინაძემ.
„ისთ ფოინთის“ მარკეტინგის დირექტორი აცხადებს, რომ საქართველოს მთავრობის მიერ წარდგენილი ანტიკრიზისულ გეგმა ძირითადად, ფიზიკურ პირებს ეხებოდა. ბიზნესი ახლა ხელისუფლებისგან კონკრეტულ ეკონომიკურ გეგმას ელოდება.
„ანტიკრიზისული გეგმა ეხებოდა ეკონომიკური საქმიანობების ეტაპობრივად გახსნას, კონკრეტული ბიზნესის მხარდაჭერის ან სხვა კონკრეტულ ქმედით ნაბიჯთან დაკავშირებით ოფიციალური გადაწყვეტილება არ მოგვისმენია. მიმდინარეობს გარკვეული კონსულტაციები წარდგენილი გეგმაც არ არის სრულფასოვანი, დამუშავების პროცესშია და ეტაპობრივად კიდევ მიმდინარეობს სხვა გადაწყვეტილებების მიღება. კონკრეტული შეთავაზება რომელიც შეიძლება მოგვეწონოს ან არ მოგვეწონოს არ არსებობს, დაველოდოთ როგორ განვითარდება მოვლენები“,- ამბობს „ისთ ფოინთის“ მარკეტინგის დირექტორი.
ბაჩო ადამია