24-25 ივლისს, ორგანიზაცია „პროგრესის ცენტრის“ ინიციატივით და „ფრიდრიხ ებერტის ფონდი საქართველოში“-ს მხარდაჭერით მედიის წარმომადგენლებისთვის ორდღიანი სემინარი გაიმართა „მინიმალური ხელფასი საქართველოში - პრობლემები და გამოწვევები“.
სემინარს ესწრებოდნენ „ფრიდრიხ ებერტის ფონდი საქართველოში“ პროექტის მენეჯერი ირინა სეფერთელაძე, პარტია „ხალხისთვის“ თავმჯდომარე ანა დოლიძე, „საქართველოს პროგრესული ფორუმი“ თავმჯდომარე დიმიტრი ცქიტიშვილი, “Know How Training Center” -ის მმართველი პარტნიორი, ეკონომისტი დავით დარსაველიძე, „საქართველოს პროფესიული კავშირების გაერთიანების“ თავმჯდომარე ირაკლი პეტრიაშვილი, CRRC -ის წარმომადგენელი დავით სიჭინავა, ახალგაზრდა ფინანსისტთა და ბიზნესმენთა ასოციაციის ვიცე პრეზიდენტი პაატა ბაირახტარი და ორგანიზაცია „პროგრესის ცენტრის“ პროექტის კოორდინატორი მარიამ კუსიანი.
მომხსენებლებმა ისაუბრეს საქართველოში მინიმალურ ხელფასის ოდენობასთან დაკავშირებულ პრობლემებზე და იმ გამოწვევებზე, რომელიც ჩვენს ქვეყანაში დასაქმებულს შრომის ღირსეული ანაზღაურებას უფლებებს უზღუდავს.
როგორც ცნობილია, საქართველოში მოქმედებს 1999 წელს, პრეზიდენტის მიერ მიღებული ბრძანებულება, რომლის მიხედვითაც მინიმალური ხელფასის ოდენობა 20 ლარია. ეს დადგენილი ოდენობა დღემდე არც ერთხელ გადახედილა და, შესაბამისად, არ შეცვლილა, მიუხედავად ინფლაციისა, საარსებო მინიმუმის თუ ცხოვრების დონის ცვლილებისა.
მინიმალური ხელფასი დიდწილად ჩამორჩება დადგენილ საარსებო მინიმუმს, თანხვედრაში არაა მის ძირითად მიზნებთან, ასევე ხელს უწყობს დასაქმებულთა ექსპლუატაციას, ვერ უზრუნველყოფს დაბალ ანაზღაურებადი პირთათვის მინიმალური საცხოვრებელი სტანდარტებით უზრუნველყოფას, სამართლიანი სახელფასო სტრუქტურის შეძლებისდაგვარად ჩამოყალიბებას, სიღარიბის აღმოფხვრასა და საშუალო ფენის შექმნას.
აქედან გამომდინარე, მინიმალური ხელფასის საკითხი ბოლო პერიოდში უფრო და უფრო აქტუალური გახდა. მისი აქტუალურობა განაპირობა მოსახლეობის სოციალური პირობების გაუარესებამ, არსებული მინიმალური ხელფასის შეუსაბამოდ დაბალმა ოდენობამ, მშრომელთა უფლებებისთვის შეუჩერებელი ბრძოლის საწყისებმა და რაც მთავარია, მოსახლეობის დიდი ნაწილის სურვილმა, განისაზღვროს მინიმალური ხელფასის ის ოდენობა, რომელიც მათი, როგორც დასაქმებულების უფლებების შესაბამისი იქნება.
როგორც მომხსენებლებმა აღნიშნეს, ყველა ეს მიზეზი ერთობლიობაში ქმნის სამართლიან საფუძველს, რომ საქართველოში დაწესდეს მინიმალური ხელფასი, რომელიც არსებულ სოციალურ გარემოსთან დინამიკაში იქნება და კონკრეტული ფაქტორების არსებობისას შეიცვლება.