კორონავირუსის გამო, სახელმწიფოს შეიძლება ფინანსური რესურსი ჯანდაცვის სექტორში დასჭირდეს. ფინანსური სახსრების მოძიება კი სხვადასხვა პროექტებისთვის გაწერილი თანხების შემცირებით მოუხდებათ. სპეცილისტების აზრით, ერთ-ერთი ასეთი ჯერ არ დაწყებული ინფრასტრუქტურული პროექტებია, რომლის დაწყებაც მიმდინარე პერიოდისთვის იგეგმება.
„ეკონომიკური ტრანსფორმაციის ცენტრის პრეზიდენტის“ რამაზ გერლიანის განცხადებით, ინფრასტრუქტურული პროექტები, რომელიც დაწყებულია უნდა დასრულდეს, რომელიც იგეგმება და ჯერ არ დაწყებულა, აუცილებლად უნდა დაპაუზდეს, ხოლო თანხები ჯანდაცვის სექტორს მოხმარდეს.
„მდგომარეობის გათვალისწინებით, ბიუჯეტს დანაკლისი აუცილებლად ექნება, უფრო მაღალი დონის ამოცანები აქვს შესასრულებელი სახელმწიფო ხაზინას, მსგავსი პროექტები კი როგორიცაა ინფრასტრუქტურა და სხვა მაქსიმალურად უნდა გადათამაშდეს და მოხმარდეს კორონავირუსთან ბრძოლას. ეკონომიკას დროებით გაჩერებულ პროექტებზე მეტად ეს პანდემია დააზარალებს. თუ ბიუჯეტს არ ექნება ძალიან დიდი დეფიციტი, მაშინ ეკონომიკური ჩავარდნის ფონზე ინფრასტრუქტურული პროექტები ერთ-ერთი გზაა დასაქმების ნაწილში, რომელიც უნდა შევინარჩუნოთ, რაც მომავალში რა თქმა უნდა მოგვცემს ეკონომიკურ ეფექტს.“-ამბობს რამაზ გერლიანი.
რაც შეეხება დაწყებულ პროექტებს, „ეკონომიკური ტრანსფორმაციის ცენტრის პრეზიდენტის“ თქმით, ისინი არ უნდა გაჩერდეს, რადგან დაწყებული პროექტების გაჩერება ქვეყნისთვის ორმაგი ზარალი იქნება. გერლიანის თქმით, დაწყებული პროექტების გაჩერებით, საწყისი თანხა იქნება დაკარგული და ეკონომიკა ორმაგ ზარალს მიიღებს.
მიმდინარე წელს დაგეგმილი ინფრასტრუქტურული პროექტების გაჩერებას ემხრობა, საკონსულტაციო კომპანია „პიემსიჯის“ გენერალური დირექტორი, ლექსო ალექსიშვილი, რომელმაც ამ თემაზე „ბიზნესპარტნიორში“ ისაუბრა.
დისკუსიის დროს „პიემსიჯის“ გენერალურმა დირექტორმა აღნიშნა, რომ არა თუ ქართული, არამედ მსოფლიო ეკონომიკა მსგავსი კატასტროფის წინაშე არ ყოფილა და დღეს მდგომარეობიდან გამოსავლის რამე მზა რეცეპტი არ არსებობს. ამიტომ ალექსიშვილი თვლის, რომ მთავრობამ მიმდინარე კრიზისის ფონზე უმჯობესია, არავითარი სტიმულირება ან გადასახდების გადავადება არ მოახდინოს და მხოლოდ კრიზისის დაძლევაზე იფიქროს.
„ამ კონკრეტულ ყველაზე ექსტრემალურ ვითარებაში ჩემი აზრით მნიშვნელოვანი იქნება, რომ მაგალითად ინფრასტრუქტურული პროექტები, რომელიც წელს გვქონდა დაგეგმილი და ამაზე ვალდებულება ჯერ არ აგვიღია, არც ავიღოთ, რადგან შეიძლება ფული დაგვჭირდეს. ეს ფული არის კრიტიკულად მნიშვნელოვანი, სახელმწიფოს სჭირდება ფინანსური რესურსი, რომელიც ეფექტურად უნდა გამოიყენოს. მესმის, რომ ინფრასტრუქტურა მნიშვნელოვანია და ის, რაც დაწყებული გვაქვს უნდა დავასრულოთ, ეს ცალსახაა, მაგრამ ის ინფრასტრუქტურული ობიექტები, რომელიც ჯერ არ დაგვიწყია, ამ წუთას მათი სასწრაფოდ განხორციელება საჭირო არ არის. საქმე ისაა, რომ საერთო ჯამში ეკონომიკური აქტივობა შემცირდება და მისი გამოყენების ეფექტურობა, განსაკუთრებით უახლოეს პერიოდში, არ იქნება მაღალი. მნიშვნელოვანი გამოწვევის წინაშე ვდგავართ. ასეთი არ ყოფილა არასდროს მსოფლიოში. ამიტომ ისევე, როგორც ჯანდაცვაში არ არსებობს რეცეპტი ამ ვირუსთან საბრძოლველად, ეკონომიკაშიც არ არსებობს კონკრეტული რეცეპტი, ეს როგორ უნდა დავძლიოთ. შესაბამისად, ნებისმიერი მცდელობა შეიძლება კონტრპროდუქტიული გამოვიდეს“, – განაცხადა ლექსო ალექსიშვილმა.
შეგახსენებთ, რომ ქვეყანაში საგანგებო მდგომარეობის გამოცხადება ინფრასტრუქტურულ პროექტებს არ შეხებიათ და ჩვეულ რეჟიმში განაგრძობენ მუშაობას. კარანტინის პირობებში კი გრძელდება სახელმწიფო მნიშვნელობის პროექტების მშენებლობა.
ნათია ლომიძე