„კრისტალისთვის“ ეს (მიკრობანკების შესახებ კანონმდებლობა) მისასალმებელი რეფორმაა და ჩვენ ვიქნებით ერთ-ერთი პირველი, ვინც მიკრო ბანკის სტატუსზე განაცხადს გააკეთებს“, — ამის შესახებ „კრისტალის“ სამეთვალყურეო საბჭოს თავმჯდომარე არჩილ ბაკურაძემ „კომერსანტთან“ საუბრისას განაცხადა.

მისი თქმით, ეს ძალიან კარგი ინიციატივაა, რომელიც მიკროსაფინანსო ორგანიზაციების გამსხვილებას გამოიწვევს და მათ მომხმარებელს ბევრ დამატებით პროდუქტზე წვდომის საშუალებას მისცემს. 

„მიკრო ბანკების საჭიროება დღეს ქვეყანაში ნამდვილად დგას, რადგან ისინი მოემსახურებიან მოსახლეობის და ეკონომიკის იმ ნაწილს, რომელიც დღესდღეობით სრულ ფინანსურ მომსახურებას ვერ იღებს. ბანკებს თავისი ბიზნეს-საქმიანობა აქვთ და მომხმარებელთა თავისი სეგმენტი ჰყავთ, ხოლო მისო-ები უფრო მეტად არაფორმალურ ეკონომიკასთან მუშაობენ.

ეს ხელს შეუწყობს ერთის მხრივ ჩვენი ორგანიზაციის ზრდას, რესურსებზე ხელმისაწვდომობას და მათ გაიაფებას, ასევე შესაძლებლობას მოგვცემს გავააქტიუროთ ახალი სერვისები, მაგალითად, როგორიცაა ბიზნეს ანგარიში და მასთან დაკავშირებული მომსახურებები, გვექნება დეპოზიტის შეზღუდული მიღების საშუალება. ამას გარდა, მოგვეცემა ეროვნული ბანკის რეფინანსირების ინსტრუმენტებზე წვდომის შესაძლებლობა, რაც ჩვენი რესურსების გაიაფების წინაპირობაა და ამავდროულად გაამარტივებს ლიკვიდობასთან წვდომას. ასე რომ ეს ცალსახად წინგადადგმული ნაბიჯია - ორგანიზაცია, რომელიც ორიენტირებული იქნება მიკრო და მცირე ბიზნესზე და იმ მოსახლეობაზე, რომელსაც საბანკო მომსახურებებზე წვდომა არ აქვთ.

ეს დამატებით კონკურენციას მისო-ებთან არ შექმნის, არამედ საშუალებას მოგვცემს, რომ მომხმარებელთა ჩვენს სეგმენტს უფრო იაფად და სრულყოფილად მოვემსახუროთ. გარკვეული კონკურენცია, თუმცა მცირე ზომით გაჩნდება იმ ბანკებთან, რომლებსაც მსგავსი მომსახურება აქვთ, მაგრამ საბოლოო ჯამში ეს მომხმარებელს მეტ სარგებელს მოუტანს“, - განმარტავს არჩილ ბაკურაძე.

აღსანიშნავია, რომ საქართველოს ეროვნული ბანკი მიკრობანკების შესახებ კანონმდებლობის მომზადებაზე მუშაობს. სებ-ის პრეზიდენტმა კობა გვენეტაძემ განაცხადა, რომ ახალი კანონმდებლობით მიკროსესხების ბაზარი უფრო ორგანიზებულ სახეს მიიღებს. გვენეტაძის თქმით, მიკრობანკების სტატუსის მიღების შემდეგ გაიზრდება იმ დეპოზიტარების სახსრების დაცულობა, რომლებმაც მისო-ების მიერ შეთავაზებულ, დეპოზიტების მსგავს ინსტრუმენტებში განახორციელეს თანხების ინვესტირება. ამასთანავე, ამ საფინანსო დაწესებულებებზე დეპოზიტების დაზღვევის სისტემაც გავრცელდება.