საქართველოს ეროვნული ბანკი მიკრობანკების შესახებ კანონმდებლობის მომზადებაზე მუშაობს. სებ-ის პრეზიდენტმა კობა გვენეტაძემ განაცხადა, რომ ახალი კანონმდებლობით მიკროსესხების ბაზარი უფრო ორგანიზებულ სახეს მიიღებს. აღსანიშნავია, რომ მიკრობანკები გახდებიან ის კომპანიები, რომლებიც ორიენტირებული იქნებიან ძირითადად მიკროსესხებზე, ფიზიკური პირების დაკრედიტებაზე, აგროსესხებზე და მცირე ბიზნეს სესხებზე. მათ ექნებათ პირდაპირი წვდომა ეროვნულ ბანკთან, ასევე, მათ შეეძლებათ, რომ ჩაერთონ დეპოზიტების დაზღვევის სისტემაში. გვენეტაძის თქმით, მიკრობანკების სტატუსის მიღების შემდეგ გაიზრდება იმ დეპოზიტარების სახსრების დაცულობა, რომლებმაც მისო-ების მიერ შეთავაზებულ, დეპოზიტების მსგავს ინსტრუმენტებში განახორციელეს თანხების ინვესტირება. მიკრობანკის სტატუსზე განაცხადის გაკეთებას მსხვილი მიკროსაფინანსო ორგანიზაციები გეგმავენ, მათ შორის ერთ-ერთი „კრისტალია“.
„კომერსანტი“ ყველა კომერციულ ბანკს დაუკავშირდა კითხვით, თვლიან თუ არა, რომ მიკრობანკების სტატუსის მოპოვების შემდეგ მიკროსაფინანსოები ზემოთ ჩამოთვლილი დაკრედიტების კუთხით კომერციული ბანკების კონკურენტები გახდებიან. ჩვენს კითხვაზე პასუხი მხოლოდ იშბანკი საქართველოსგან მივიღეთ. მსხვილმა ბანკებმა „საბანკო ასოციაციაში“ გადაგვამისამართეს, ხოლო დანარჩენებმა პასუხისგან თავი შეიკავეს.
„კომერსანტთან“ საუბრისას სს „იშბანკი საქართველოში“ აცხადებენ, რომ მიკროსაფინანსო ბაზარს ჰყავს თავის მომხარებელი და შესაბამისად ისინი მიკრობანკებად გარდაქმნის შემდეგაც ვერ იქნებიან კომერციული ბანკების კონკურენტები.
„მიკრო ბანკების შექმნის ინიციატივა მისასალმებელია, რადგან იგი გამოიწვევს მიკროსაფინანსო სექტორის მეტად რეგულირებასა და ორგანიზებას, რაც თავის მხრივ გაზრდის მათ ხელმისაწვდომობას დამატებით პროდუქეტბზე. საბოლოო ჯამში კი, ის სეგმენტი და მომხარებელი, რომელიც ამჟამად წარმოადგენს მიკროსაფინანსო სექტორის კლიენტურას, იქნება მეტად დაცული და ექნებათ შესაძლებლობა მრავალფეროვან პროდუქტებსა და მომსახურებაზე ხელმისაწვდომობის. როგორც ზემოთ აღვნიშნეთ, მიკროსაფინანსო ბაზარს ჰყავს თავის მომხარებელი და შესაბამისად ვფიქრობთ, რომ მიკრო ბანკები ვერ იქნებიან კომერციული ბანკების კონკურენტები, მათ შორის ჩვენი ბანკის შემთხვევაშიც“, - აღნიშნავენ „იშბანკი საქართველოში“.
„საბანკო ასოციაციის“ ხელმძღვანელი ალექსანდრე ძნელაძე კი აცხადებს, რომ მიკროსაფინანსოები კომერციული ბანკების კონკურენტები დღესაც არიან, იმიტომ რომ ერთ ბაზარზე საქმიანობენ, თუმცა ზოგადად მსგავსი დიფერენცირებული ლიცენზიების გაცემა ახალი და კარგი პრაქტიკაა.
„მიკრობანკის ლიცენზია რას გულისხმობს ჯერჯერობით სრულფასოვნად არ არის მოცემული. რეალურად ვიცით მხოლოდ მონახაზი, რომ მიკროსაფინანსო ორგანიზაცია თუ მოინდომებს, რომ მიიღოს საბანკო ლიცენზია, მათთვის იქნება დიფერენცირებული ლიცენზია, გარდა ამისა კონკრეტულად რას მოიცავს ის არ ვიცით. თუმცა დიფერენცირებული ლიცენზიების გაცემა ახალი პრაქტიკაა და კარგია რომ ინერგება.
რაც შეეხება კონკურენციას, მიკროსაფინანსოები კომერციული ბანკების კონკურენტები დღესაც არიან, იმიტომ რომ ერთ ბაზარზე საქმიანობენ. ამ შემთხვევაში მნიშვნელოვანია რამდენად სრულფასოვანი იქნება ეს ლიცენზია და რას მოიცავს ის. დღეს მიკროსაფინანსოები ბანკებისგან 2 მნიშვნელოვან ნაწილში განსხვავდებიან, პირველი სესხის გასაცემი თანხის რაოდენობის შეზღუდვაა და მეორე, მათ არ შეუძლიათ ფიზიკური პირებისგან კონკრეტული თანხის ქვემოთ მიღება“, - განმარტა ალექსანდრე ძნელაძემ.