Microsoft იანვარში აცხადებდა, რომ დისტანციური სწავლების პირობებში მისი კორპორაციული პლატფორმით Teams მთელ მსოფლიოში 100 მილიონი მოსწავლე სარგებლობდა. რამდენიმე დღის წინ კორპორაციამ კიდევ ერთი ნაბიჯი გადადგა, რომელიც საგანმანათლებლო ბაზარზე მის გაფართოებას ემსახურება: შეიძინა ონლაინ–სწავლების პლატფორმა TakeLessons.
TakeLessons ინდივიდუალური და მცირე ჯგუფების სწავლებისთვის შეიქმნა. პლატფორმაზე საგნების უზარმაზარი სპექტრია წარმოდგენილი: ზუსტი მეცნიერებებით – მათემატიკითა და ქიმიით დაწყებული – სხვადასხვა ენებისა და პროგრამირების სწავლებით დამთავრებული. აქვე შეგიძლიათ გაკვეთილების მიღება ხელოვნების სფეროში: შეისწავლოთ მუსიკა და აითვისოთ რომელიმე ინსტრუმენტი, აიმაღლოთ მართლწერა და შეიძინოთ ესეების წერის უნარები, ისწავლოთ ხატვა, დიზაინი და კერვაც კი. ამდენად, პლატფორმის სერვისები სასარგებლო შეიძლება იყოს სასკოლო და საუნივერსიტეტო გამოცდებისთვის მოსამზადებლადაც. საიტზე განთავსებული ინფორმაციის თანახმად, ამ დროისთვის პლატფორმაზე დაახლოებით 4 მილიონი გაკვეთილია ჩატარებული.
პლატფორმა 2006 წელს შეიქმნა – მისი თავდაპირველი კონცეფცია იყო, რომ ადამიანებს ქსელში ამ რესურსის გავლით მოეძებნათ რეპეტიტორები. მოგვიანებით TakeLessons ძირითადად ონლაინ–ფორმატში გადავიდა. პლატფორმაზე დიდი გამოცდილების და მაღალი რეიტინგის მქონე მასწავლებლები მუშაობენ. პლატფორმა შერჩეულ საგანში პირველ სატესტო გაკვეთილსაც სთავაზობს მომხმარებელს – თუ მოსწავლე უკმაყოფილო დარჩება, შეუძლია გადახდილი თანხის დაბრუნება და შემდგომ სწავლებაზე უარის თქმა.
ამ გარიგების პირობებს არცერთი მხარე არ ასაჯაროებს. პორტალმა TechCrunch მხოლოდ ის შეიტყო, რომ Microsoft–თან შერწყმამდე TakeLessons–მა ვენჩურული კომპანიებისა და წმინდა ინვესტორებისგან $20 მლნ–ის მოზიდვა შეძლო.
TakeLessons–მა გარიგების შესახებ მოკლე ინფორმაცია განათავსა საიტზე, სადაც ვკითხულობთ, რომ უახლოეს მომავალში პლატფორმა ჩვეულ რეჟიმში გააგრძელებს მუშაობას, მაგრამ კურსს უფრო ფართო აუდიტორიაზე გასვლისკენ აიღებს.
Microsoft–მა პლატფორმა იმ პირობებში იყიდა, როდესაც პანდემიის გამო დისტანციური სწავლების სერვისებზე მოთხოვნა შეუქცევადად იზრდება. კორპორაცია შემთხვევით არ ხედავს ამ მიმართულებით დიდ შესაძლებლობებს. ამდენად, კომპანიამ საკუთრებაში მსხვილი რესურსი მიიღო, რომელსაც სხვა საგანმანათლებლო პლატფორმებთან კონკურენციის გაწევა შეუძლია.
TechCrunch–ის ინფორმაციით, კორპორაცია გრძელვადიან გეგმებში პლატფორმის ფუნქციონალის გაუმჯობესებას, არსებული მომხმარებლების შენარჩუნებასა და ახლების მოზიდვას გეგმავს.