Sony-მ 20 მლრდ დოლარი მას შემდეგ დაკარგა, რაც გამოცხადდა, რომ ტექნოლოგიური გიგანტი, Microsoft ვიდეო თამაშების დეველოპერ Activision Blizzard-ს ყიდულობს. ინფორმაციას Bloomberg ავრცელებს.

ტოკიოში Sony-ს აქციები 13%-ით დაეცა, რაც, 2008 წლის ოქტომბრის შემდეგ, ყველაზე დიდი ვარდნაა. კომპანიის კაპიტალიზაცია ერთ დღეში 20 მლრდ დოლარით დაეცა.

სააგენტოს შეფასებით, თამაშების უზარმაზარი პორტფელით გადამხდელი აბონენტების მიზიდვა Sony-ის გამოწვევაა. კომპანიის ტრადიციული კონსოლის ბიზნეს-მოდელი მაღალი დონის ექსკლუზიური თამაშებისა და ტექნიკის გაყიდვებს მოიცავს. ზოგადად, თამაშებისა და ქსელური სერვისების წილი Sony-ს შემოსავლებში, დაახლოებით, 30%-ია.

ამასთან, სხვა ვიდეო თამაშების კომპანიების ღირებულებამ, Microsoft-ის გარიგების გამოცხადების შემდეგ, პირიქით, მოიმატა. მაგალითად, ტოკიოს ბირჟაზე Capcom-ისა და Square Enix Holding-ის აქციები 3,7%-ზე მეტად გაიზარდა. ანალიტიკოსების შეფასებით, იმ სათამაშო კომპანიების ღირებულება გაიზარდა, რომლებსაც ძლიერი კონტენტი და ინტელექტუალური საკუთრების პორტფელი აქვთ.

ერთი დღით ადრე Microsoft-მა თამაშების, World of Warcraft-ისა და Call of Duty-ის შემქმნელი კომპანიის, Activision Blizzard-ის 68,7 მლრდ დოლარად შეძენა დააანონსა. დასრულების შემდეგ ეს გარიგება სექტორში ყველაზე მსხვილი იქნება, რის შედეგადაც Microsoft, შემოსავლების მიხედვით, Tencent-ისა და Sony-ის შემდეგ, მსოფლიოში სიდიდით მესამე ვიდეო თამაშების კომპანია გახდება.

BPN.GE