ევროპული ავიახაზების ბორტზე 5G ფორმატის უკაბელო კომუნიკაცია გაჩნდება, რაც მგზავრებს საშუალებას მისცემს მობილური ტელეფონით პირდაპირ ფრენის დროს დარეკონ და ასევე ისარგებლონ ინტერნეტით. ამის შესახებ Bloomberg-ი წერს.

კომუნიკაცია უზრუნველყოფილი იქნება ბორტზე სპეციალურად დაყენებული აღჭურვილობით, ეგრეთ წოდებული pico-cell-ით, რომელიც ბორტ-სისტემას თანამგზავრთან დააკავშირებს, საიდანაც სიგნალი დედამიწას გადაეცემა.

მგზავრებისთვის  ხელმისაწვდომი იქნება სმარტფონის ყველა ფუნქცია -  მათ შეეძლებათ დარეკონ და დაწერონ ტექსტური შეტყობინებები, შეამოწმონ ფოსტა, უყურონ ვიდეოებს, ითამაშონ ვიდეო თამაშები და ა.შ. მგზავრებს ჰპირდებიან, რომ ისინი ვერ იგრძნობენ განსხვავებას კომუნიკაციის ხარისხში და ფასში.

ზარებისთვის სპეციალურად იგეგმება ჯერ კიდევ 2008 წელს წინასწარ დაჯავშნილი სიხშირეების გამოყოფა, რომელიც ევროკავშირის ქვეყნების მიერ ახლა სხვა მიზნით გამოყენება და  მათ ამ სიხშირეების გამოთავისუფლება მოუწევთ. მხოლოდ ამის შემდეგ გახდება შესაძლებელი  თვითმფრინავებში ტელეფონით სარგებლობა, მაგრამ როგორც ევროკომისია მიუთითებს, ეს უნდა მოხდეს არაუგვიანეს მომავალი წლის ივნისისა.

„5G უზრუნველყოფს ინოვაციურ სერვისებს ადამიანებისთვის  და ახალ შესაძლებლობებს ევროპული კომპანიებისთვის“, - აცხადებს ევროკომისარი შიდა ბაზრის საკითხებში ტიერი ბრეტონი.

ადრე, მსგავსი გეგმა უკვე განიხილებოდა ამერიკის შეერთებულ შტატებში, მაგრამ მარეგულირებელმა მისი განხორციელება უსაფრთხოების მიზეზების გამო აკრძალა, საბაბად კი დასახელდა ის, რომ თავად ავიახაზები და თვითმფრინავის ეკიპაჟები კატეგორიულად ეწინააღმდეგებიან ბორტზე მობილურ კომუნიკაციას.