საქართველოს საფონდო ბირჟაზე თურქი ბიზნესმენის გალიფ ოზთურქის სს „მეტრო ეიფორია ჰოტელ ბათუმის“ აქციები დაილისტა. B კლასის აქციები (ISIN GE1100003932) დაშვებულ იქნა საქართველოს საფონდო ბირჟის B კატეგორიის ლისტინგში და სავაჭრო სისტემაში. აქციებს საბირჟო კოდი (ტიკერი) - MEHBB მიენიჭა.
ბირჟაზე B ჯგუფის 54,476,929 ლარის ჯამური ნომინალური ღირებულების აქცია დაილისტა, თითოს ნომინალის ფასი 1 ლარია. კომპანიას ასევე გამოშვებული აქვს A კლასის 6 052 993 აქცია, რომლის 1 აქცია 15 ხმას უდრის და მონაწილეობს სამეთვალყურეო საბჭოს არჩევაში, ხოლო B კლასის 1 აქციის ფასი 1 ხმის უფლებას უზრუნველჰყოფს.
„მეტრო ეიფორია ჰოტელ ბათუმი“ 2017 წელს დაარსდა და თავდაპირველად მოიცავდა ბათუმში მდებარე სასტუმრო „ეიფორიას“ და მასში არსებული რესტორნის მართვას. 2017-2019 წლებში კომპანიამ იჯარით აიღო 4 სასტუმრო: „ბიზნეს ლეჯენდი“, „ინტურისტი“, „მეტრო სქაი თაუერი“ და აპარტამენტები ეიფორიაში. ასევე 2019 წლის 3 თვის განმავლობაში კომპანია მართავდა „სითი ჰოტელ ბათუმს“, რომელთანაც ხელშეკრულება კომპანიამ 2020 წლის მარტიდან განაახლა.
კომპანიის 100%-იანი წილი „მეტრო თიჯარი ვე მალი იათირიმლარ ჰოლდინგს“ ეკუთვნის, რომლის ყველაზე დიდი აქციონერი (38.11%) „გალიფ ოზთურქ ტურიზმ იათირიმლარია“, რომლის მფლობელიც გალიფ ოზთურია. კომპანია „მეტრო ეიფორია ჰოტელ ბათუმი“ 2019 წლის მონაცემებით ფლობს 87 570 000 ლარის აქტივებს, ხოლო კომპანიის წმინდა მოგება 2 550 000 ლარია.
ნინო თამაზაშვილი