საქართველოს ბუნებრივი ბრილიანტი - ეს მესტიაა, ადგილი, სადაც წელიწადის ყველა დრო გამორჩეულად ლამაზია. ადგილი, სადაც დრო ჩერდება და ცდილობ თითოეული წამი შეიგრძნო, რომელსაც ქართული უძველესი კულტურის საცავში ატარებ. დაბა წლებთან ერთად საქართველოს ერთ-ერთ ყველაზე მიმზიდველ და პერსპექტიულ ტურისტულ მიმართულებად ჩამოყალიბდა. ყველაფერი კი 2010 წელს დაიწყო, როდესაც ინფრასტრუქტურა განახლდა - მოწესრიგდა შიდა გზები, რეაბილიტაცია ჩაუტარდა საცხოვრებელ სახლებს, გამოიცვალა აივნები და განათდა კოშკები, მოეწყო ოლიმპიური სათხილამურო ტრასები, მაშინ მესტიის აეროპორტმა პირველი თვითმფრინავიც მიიღო. „კომერსანტი“ მოგიყვებათ, რა შეიცვალა 11 წლის განმავლობაში და როგორ განვითარდა ქვეყნის უნიკალური მხარე.

მესტიამდე მისასვლელი გზა,  ელექტროენერგიის მიწოდება, ბუნებრივი აირისა და საკანალიზაციო სისტემის არარსებობა, გასართობი ადგილების ნაკლებობა - ეს იმ პრობლემების ჩამონათვალია, რომელიც დაბაში წლებია ვერ მოგვარდა. სასტუმრო „გისტოლას“ გენერალური მენეჯერი, მაია მურაჩაშვილი დეტალურად  გვიყვება დღეს მესტიაში არსებული მდგომარეობის შესახებ, იმ გამოწვევებზე, რომელთან გამკლავებასაც კერძო სექტორი დამოუკიდებლად, ადგილობრივი მთავრობის გარეშე ცდილობს. ამბობს, რომ მესტიაში კოშკების მხოლოდ ნაწილია განათებული. მურაჩაშვილის თქმით, ის დიდი, მასიური განათება, რომლის სილამაზეც ყველა ტურისტს აღაფრთოვანებდა, აღარ არსებობს.

„დღემდე მესტიას არ აქვს გაზი, იმის გამო რომ ბუნებრივი აირი არ მოგვეწოდება საკმაოდ დიდი პრობლემები იქმნება. სვანეთში რთული კლიმატური პირობებია, ამ დრომდე ოთახებში გათბობა გვაქვს ჩართული, შესაბამისად ეს ყველაფერი ელექტროენერგიაზე ან სხვა ალტერნატიულ საშუალებაზე გადადის, რომელსაც საწვავი სჭირდება, რაც ძალინ ძვირია. გაცილებით სავალალოა მდგომარეობა ელექტროენერგიასთან დაკავშირებით. სამწუხაროდ, ძალიან ხშირია ავარიული გათიშვები, დღეში რამდენჯერმეც კი. ეს დიდ პრობლემას იწვევს - გაყინული პროდუქცია, რომელიც მაცივარში გვაქვს ფუჭდება, სტუმრები უშუქობით უკმაყოფილოები არიან. ამის გამო კი იძულებულები გავხდით ალტერნატიული საშუალება შეგვეძინა, რაც დიდი ხარჯებთანაა დაკავშირებული. ზოგჯერ დენი ცენტრალურ გზაზეც კი ქრება. მესტიაში ამოსასვლელი, რამდენიმე ადგილი ისევ გაფუჭებულია, თუმცა სპეც - ტექნიკა ყოველთვის მობილიზებულია და ამ კუთხით შეფერხებები დიდად არ არის. რაიმე დამატებით, რომელიც მესტიას ახალ ხიბლს შესძენდა გაკეთებული არ არის. ძირითადად კერძო სექტორი მუშაობს.

იმისთვის, რომ გამართული სერვისი გქონდეს, ძალიან დიდი თანხის ინვესტირება უნდა მოახდინო. გამართულად მუშაობა ოთახის თვითღირებულებას იმდენად გიძვირებს, რომ იძულებული ხარ ნომრის ფასი გაზარდო, მომატებული ფასი ცხადია პანდემიურ პერიოდში რთული გადასახდელია. იმის გამო, რომ გასართობი ადგილების ნაკლებობაა, ჩვენს კომპლექსში არის ბავშვთა გასართობი ცენტრი, ლაუნჯი და ღამის კლუბი. როგორც კი რეგულაციები მოიხსნება ობიექტებს გავხსნით. პირველები ვიქნებით, ვინც ტურისტებს მესტიაში ღამის გართობას შესთავაზებს“, - გვიყვება მაია მურაჩაშვილი.

დაბაში არსებულ პრობლემებზე „კომერსანტთან“ ერთ-ერთი უმსხვილესი სასტუმროს „თეთნულდის“ მეპატრონე საუბრობს. იგი ფიქრობს, რომ მესტიას დღეს პატრონი საერთოდ არ ჰყავს და წლების განმავლობაში დაგროვებული პრობლემების მოგვარებაზე არავინ ზრუნავს:

„დღეს მესტია პრობლემურია, დაბა თბილისიდან ძალიან შორსაა, ამის მიუხედავად, როდესაც ტურისტი ჩამოდის მაქსიმალური სიამოვნება უნდა მიიღოს, თუმცა დღეს მას ამის ფუფუნება არ აქვს. მე ვფიქრობ, რომ მესტიას პატრონი საერთოდ არ ჰყავს, თუ ნორმალური მისასვლელი გზები არ გექნა, როგორ გინდა ტურისტები მოიზიდო? ამაზე სახელმწიფომ უნდა იზრუნოს, ჩვენ ხომ არ ვიზრუნებთ? ყოველი ზამთრის შემდეგ გზები ამოთხრილ-გადათხრილია. არაა ისეთი ინფრასტრუქტურა, როგორიც ტურისტულ ქალაქს სჭირდება“, განაცხადა თეთნულდის მეპატრონემ.

საუკუნოვანმა კოშკებმა 11 წლის წინ ახალი სახე შეიძინეს, წლების წინ განახლებული მესტია საქართველოს ერთ-ერთი საუკეთესო ტურისტული მიმართულებაა, მაგრამ იქ არსებული პრობლემები დიდ დისკომფორტს უქმნის როგორც ჩასულ ტურისტებს, ასევე ადგილობრივ მოსახლეობასაც. თუმცა თავისი უნიკალური ლანდშაფტის გამო დაბა მიმზიდველობას არ კარგავს.

ბაჩო ადამია