თბილისში ავარიული მრავალბინიანი საცხოვრებელი სახლების ჩანაცვლების წესი იცვლება. ცვლილების თანახმად, თუ აქამდე ავარიული სახლების ჩანაცვლება იმ შემთხვევაში დაიშვებოდა, როდესაც შენობა ნაგებობის ავარიულობის ხარისხი V, IV ან III კატეგორიას მიეკუთვნებოდა და მის ჩანაცვლებაზე დაინტერესებული პირების სრული თანხმობა იქნებოდა. ცვლილებების მიხედვით თბილისის მუნიციპალიტეტის მთავრობის თანხმობით, პროექტის განმახორციელებელი უფლებამოსილია, ავარიული სახლის ჩანაცვლების საკითხი სხვა მიწის ნაკვეთზე დაინტერესებულ პირთა სრული თანხმობის გარეშე განიხილოს. 

იურისტი ბადრი ნიაური „კომერსანტთან“ ამბობს, რომ ცვლილების მიუხედავად, იმ მცირე ნაწილის გათვალისწინება მაინც აუცილებელია, ვინც უარზეა, რადგან პროექტის განხორციელების შემთხვევაშიც კი, ის მაინც დავის საგანი გახდება და  სამომავლოდ სახელმწიფოს შესაძლოა უფრო ძვირი დაუჯდეს სასამართლოების გზით ამ ხალხის დაკმაყოფილება. 

„ეს საკითხი ორმხრივია, ერთის მხრივ ძალიან კარგია, რადგან სრული თანხმობა საჭირო აღარ იქნება, ამ შემთხვევაში უმეტესი მაცხოვრებლების ინტერესი კმაყოფილდება, მაგრამ იმ მცირე ნაწილის თანხმობის გარეშე როცა ხდება პროექტის განხორციელება, უმცირესობის ინტერესები ილახება. შესაბამისად, სახელმწიფოს ხედვები და მიზანი გასაგებია, მაგრამ ვფიქრობ იმ შემთხვევაში, თუკი ვინმეს არ აქვს თანხმობა, უნდა მოხდეს მისი სხვაგვარი კონპენსირება. იმისთვის, რომ პროექტი არ გაჩერდეს, გასაგებია რომ 100%-ს თანხმობა შეიძლება არ იყოს, მაგრამ უარის მთქმელ ნაწილზე უნდა მოხდეს ინდივიდუალური შეთანხმება.

თუმცა წინააღმდეგობა პირობითია, არსებობენ ადამიანები, რომლებსაც აქვს საცხოვრისი, პრობლემა არ აქვთ და სთავაზობენ შედარებით ნაკლები ღირებულების აქტივს, შესაბამისად მან შეიძლება მოითხოვოს და მისთვის მისაღები იყოს სხვა შეთანხმება და არა ის, რაც უმრავლესობისთვის არსებობს. იმ ნაწილის გათვალისწინება, ვინც უარზეა, აუცილებლად უნდა მოხდეს, რადგან საბოლოოდ მაინც გახდება დავის საგანი სასამართლოს წესით.

შესაძლოა პროექტი შედგეს, მაგრამ სამოქალაქო კოდექსი და სამართლებრივი ნორმები უფრო მაღლა დგას, ამიტომ სასამართლო გადაწყვეტილებებით შეიძლება მაინც მოუწიოს მერიას თუ სხვა უწყებას, რომ ამ უარის მთქმელი კონტინგენტის კონპენსირება მოახდინოს და უფრო ძვირიც დაუჯდება. ამიტომ სამართლებრივად უნდა მოხდეს ამ საკითხის ძალიან საფუძვლიანი მექანიზმის გამოძებნა, იმისთვის რომ სამომავლოდ უფრო ძვირი არ დაუჯდეს სახელმწიფოს, სასამართლოების გზით, შემდგომში ამ ხალხის დაკმაყოფილება“, — ამბობს ბადრი ნიაური.

ზემოაღნიშნული წესის შესაბამისად განხორციელებული მშენებლობის შედეგად წარმოშობილი ფართები გამოყენებული იქნება მხოლოდ ამავე მშენებლობის განხორციელების და ავარიული საცხოვრებელი სახლების მესაკუთრეთა დაკმაყოფილების მიზნით. საკუთრების ჩანაცვლება ხდება იმ მიწაზე აშენებულ ახალ შენობა-ნაგებობაში არსებული ფართით, რომელზეც განთავსებული იყო ავარიული სახლი. დაინტერესებული პირის საკუთრებად იანგარიშება ფართი, რომელიც ფიქსირდება ამონაწერში საჯარო რეესტრიიდან, ხოლო მისი არარსებობის შემთხვევაში, ტექნიკური ინვენტარიზაციის არქივში აღრიცხული ფართი, რომლის საცხოვრებლად ან კომერციული დანიშნულებით გამოყენება დადასტურებული იქნება ამხანაგობის ყველა წევრის მიერ ერთხმად.