ეროვნული მოძრაობის ლიდერის მერაბ კოსტავას სახლ-მუზეუმის რესტავრაცია-რეაბილიტაციის დეტალური საპროექტო-სახარჯთაღრიცხვო დოკუმენტაციის შედგენაზე გამოცხადებული ტენდერ არ შედგა. 16 სექტემბერს გამოცხადებულ შესყიდვას ახლა შეწყვეტილის სტატუს აქვს.  შესყიდვის სავარაუდო ღირებულება 153 400 ლარი იყო.

როგორც შესყიდვის შეწყვეტის ოქმიდან ირკვევა, სატენდერო კომისიის სხდომაზე, მიღებულ იქნა გადაწყვეტილება ელექტრონული ტენდერის შეწყვეტის და ახალი სატენდერო კომისიის სხდომის ჩატარების შესახებ, რა დროსაც ელექტრონული ტენდერი აუქციონის გარეშე გამოცხადდება.

ოფიციალურ დოკუმენტში ვკითხულობთ, რომ შენობის ისტორიული, არქიტექტურული და მემორიალური ღირებულებიდან გამომდინარე, აუცილებელია შენობის რესტავრაცია-რეაბილიტაციის საპროექტო-სახარჯთაღრიცხვო დოკუმენტაციის შედგენისას გათვალისწინებული და შესაბამისად დაფასებულ იქნას შენობის ეპოქალური ფასეულობები: აუთენტურობა, არქიტექტურული სახე, მთლიანობა, მხატვრული დეტალები და სხვა.

შენობის რესტავრაცია-რეაბილიტაციის პროექტი უნდა დაეფუძვნოს არქიტექტურული, კონსტრუქციული, საინჟინრო და მხატვრული დეტალების საფუძვლიან კვლევას და ამ კვლევის შედეგად განსაზღვრულ საჭიროებებს.

სარესტავრაციო-სარეაბილიტაციო ჩარევის მთავარ მიზანს და ამოცანას უნდა წარმოადგენდეს შენობის ზემოთ აღნიშნული ღირებულებების დაცვა, რაც გულისხმობს არსებული არქიტექტურული სახის მაქსიმალურ შენარჩუნებას და დამაზიანებელი ფაქტორების აღმოფხვრის შედეგად შენობის ფიზიკური მდგომარეობის გაუმჯობესებას და გრძელვადიანი დაცულობის უზრუნველყოფას.

კვლევის პროცესში ზედმიწევნით სრულყოფილად უნდა მოხდეს შენობის ყველა ღირებული დეტალის გრაფიკული და ფოტო ფიქსაცია.

რაც შეეხება ტექნიკურ მოთხოვნებს, დოკუმენტში ვკითხულობთ, რომ:

− შენობაში სრულად უნდა განახლდეს შიდა ტექნიკური ქსელი: მოეწყოს გათბობა-გაგრილების ახალი სისტემა;

− სრულად უნდა შეიცვალოს და სამუზეუმო სივრცის შესამაბისად მოეწყოს ელ. მომარაგების ქსელი და სუსტი დენების ქსელი;

− ახლიდან უნდა მოეწყოს სან. კვანძი და სამზარეულო;

− შენობა უნდა იყოს წვდომადი შეზღუდული შესაძლებლობის პირთათვის და მათი გადაადგილება შიდა სივრცეებში (მათ შორის სან. კვნაძებში) უნდა იყოს უსაფრთხო;

− შენობის მიმდებარე, საკუთრებაში არსბეული სივრცე მოეწყოს მოთხოვნებიდან გამომდინარე, ისე რომ შესაძლებელი იყოს საზოგადოებრივი სივრცის საჭიროებების გათვალისწინება და უსაფრთხოება.

მერაბ კოსტავას მემორიალური სახლ-მუზეუმი 1991 წელს, საქართველოს პირველი პრეზიდენტის, ზვიად გამსახურდიას ინიციატივითა და თაოსნობით დაარსდა. მუზეუმმა ბინა დაარსებისთანავე ზანდუკელის ქუჩის N1-ში დაიდო, მემორიალურ სახლში, სადაც 1939 წელს დაიბადა და სიცოცხლის ბოლომდე მოღვაწეობდა საქართველოს ეროვნული გმირი მერაბ კოსტავა.

სახლი ზანდუკელის ქუჩაზე მერაბ კოსტავას ბაბუას – გამოჩენილ საზოგადო მოღვაწეს, პედაგოგს, რუსული ენის მრავალი სახელმძღვანელოს ავტორს – ვლადიმერ დემურიას ეკუთვნოდა. სახლის ეზოსთან არაერთი საინტერესო ისტორიაა დაკავშირებული. აქ 1924 წელს პირველი სახელმწიფო-საზოგადოებრივი დაწესებულება - „მთიელთა საბავშვო სახლი“ დაარსდა. მოგვიანებით კი, პედაგოგიკის სამეცნიერო-კვლევითი ინსტიტუტი და იაკობ გოგებაშვილის სახელობის ბიბლიოთეკა განთავსდა. მე-20 საუკუნის მეორე ნახევარში ეზო ეროვნულგანმათავისუფლებელი მოძრაობის ერთგვარ ეპიცენტრად იქცა და დღემდე „მერაბის ეზოდ“ მოიხსენებენ.

სახლ-მუზეუმს გახსნის დღიდან სიცოცხლის ბოლომდე (2003 წლამდე) ხელმძღვანელობდა მერაბ კოსტავას დედა – ოლღა დემურია-კოსტავა, რომელმაც საკუთარი ბინის ნაწილი – ორი ოთახი სახელმწიფოს მემორიალური სახლ-მუზეუმის გახნის მიზნით გადასცა.

მერაბ კოსტავას მემორიალურ სახლ-მუზეუმში დაცულია მერაბ კოსტავას პირადი ნივთები, მემორიალური ავეჯი, ბიბლიოთეკა, ხელნაწერები, ნოტებისა და გრამფირფიტების კოლექცია, მე-20 საუკუნის II ნახევრის ეროვნულ-განმათავისუფლებელი მოძრაობის ფოტო და დოკუმენტური მასალა, პირადი წერილები, მისი თაოსნობით გამოცემული არალეგალური ჟურნალ-გაზეთები და სხვა.

ბაჩო ადამია