ანალიტიკოსი მერაბ ჯანიაშვილი სოციალურ ქსელში ეროვნული ბანკის კლასტერის თემას ეხმაურება და ვარაუდს გამოთქვამს, რომ თანამშრომლების ჯგუფურად იზოლირება ეროვნულმა ბანკმა საკარანტინე თანხების ეკონომიის მიზნით მოახდინა.

„მოკლედ, ამ ეროვნული ბანკის კლასტერმა ლენტეხი ჩაკეტა და ლამის ნახევარი საქართველო მოიცვა. ამ ეტაპზე, კორონავირუსი ეროვნული ბანკის სულ 16 თანამშრომელს დაუდასტურდა, და რიგ შემთხვევებში გადაედო მათთან კონტაქტში მყოფ პირებსაც.

და, რამ გამოიწვია ასეთი ზრდა იცით, - რისკის ჯგუფში ვინც იყვნენ (მათ შორის, ინფიცირებულთან უშუალო შემხებლობაში მყოფები), რამდენიმეკაციანი ჯგუფი თვითიზოლაციაში გადასულა ჯგუფურად. გადასულა რა, ირკვევა, რომ მათთვის ეროვნულ ბანკს ერთი სივრცე, ანუ ერთი სახლი უქირავებია კარანტინისთვის. მერე იქ კიდევ გარედან შესულა, სავარაუდოდ, მათი სხვა თანამშრომელი და საბოლოოდ, ვისაც არ ქონდა იმ ჯგუფში ვირუსი, მათაც გადადებია.
ცუდი ამბავია ძალიან. ძალიან ცუდი.

ერთი ისიცაა, რომ ამ კორონას გადამკიდე, ჯოგური იმუნიტეტი გავიგე უკვე, მაგრამ ეს „ჯოგური იზოლაცია“ ნამდვილად არ მსმენია. როგორც ჩანს, ეს ჯოგური იზოლაცია კობა გვენეტაძის „ნოუ ჰაუა და საკარანტინე თანხების დაზოგვას ისახავს მიზნად...

იზოლაცია ნიშნავს განცალკევებას, ერთმანეთისგან სრულად განცალკევებას. და არ მესმის, რა გახდა ამ ხალხის სათითაოდ განცალკევება - ანუ, ი ზო ლი რე ბა!.. ნეტავ, მართლა გვენეტაძემ „დაზოგა“ საკარანტინე ფული?!. მაგრამ ეს ჩვენი სებ-ი 50 მილიონს იხდის ახალი ოფისის აშენებაში (ემანდ თანამშრომლებისთვის კომფორტის შექმნის მიზნით) და 10 კაცის სათითაოდ იზოლირებაში დაზოგა ფული მაინცა და მაინც?“, - წერს სოციალურ ქსელში მერაბ ჯანიაშვილი.