თბილისის მთავარი ტურისტული ცენტრი, რომელიც Meidan Group-ის მფლობელობაშია სამი თვის მანძილზე პანდემიის გამო სრულად გაჩერებული იყო. Meidan-ზე კაფე-რესტორნების, კარაოკე-ბარებისა თუ სხვა ობიექტების ჯგუფთან თანამშრომლობის საკითხი, როგორც Meidan Group-ის მარკეტინგის მენეჯერი განმარტავს, გადაიხედება და განახლებული სამუშაო გეგმა დაინერგება.

„ეს პერიოდი ყველა კომპანიისთვის არც ისე სახარბიელო იყო. მითუმეტეს ჩვენთვის, რადგან მთავრ ტურისტულ ცენტრში ვიმყოფებით და ჩვენი ძირითადი საქმიანობა მაინც უცხოელ ვიზიტორებთანაა დაკავშირებული, შესაბამისად ძალიან შეგვეხო ეს პარალიზებაც. თუმცა, ვცდილობთ, ჩვენს მოიჯარეებს, კაფე-რესტორნებს, რაც Meidan-ზეა განთავსებული, მაქსიმალურად ხელი შევუწყოთ, რომ ისევ დაიწყოს ხალხმრავლობა და ხელსაყრელი პირობები ჰქონდეთ ფინანსური, თუ სხვა კუთხით. აქაურობა ისევ უნდა გამოცოცხლდეს. ჯერჯერობით ყველა რესტორანი რჩება ადგილზე და არავის დაუტოვებია ტერიტორია, თუმცა მოლაპარაკებები გვაქვს, თუ როგორ გავაგრძელებთ სამომავლო ურთიერთობებს, მიმდინარეობს ხელშეკრულებების გადახედვა და ურთიერთობების გადაფასება“, - განმარტავს Meidan Group-ის მარკეტინგის მენეჯერი ნათია ცეცხლაძე.

ამასთან, კომპანიის ერთერთი სტრატეგია, რომელსაც ერთი წლის წინ ჩაეყარა საფუძველი, ესაა „ბამბის რიგისთვის“ ძველი ფუნქციური დატვირთვის დაბრუნება. რიგი, რომელიც წლების წინ ტექსტილის საწარმო ზონა იყო დღეს ქართველი დიზაინერების ქუჩად უნდა გადაკეთდეს. რამდენიმე დღის წინ „ბამბის რიგს“ Tsikolia’s Saatebi-ს მაღაზია დაემატა.

„ბამბის რიგის“  ქართველი დიზაინერების ქუჩად გადაკეთების პროცესი ახლაც მიმდინარეობს. გარკვეულწილად წინ წავიწიეთ, თუმცა არსებულმა მდგომარეობამ ცოტა შეგვაფერხა. რიგს დაემატა Tsikolias Saatebi-ს ბუტიკი, სამომავლოდ სხვა დიზაინერებიც შემოგვიერთდებიან და ამ კოცეფციას მივყვებით, რადგან გვინდა ქართველი დიზაინერების ნამუშევრებით იყოს დატვირთული ეს რიგი“,- განმარტავს ნათია ცეცხლაძე.

„ბამბის რიგში“ წარმოდგენილია ქეთი ჩხიკვაძის, აკა ნანიტაშვილის, დიანა ქვარიანის, ლიას, „კაბინის სამოსი“ და როგორც Meidan Group-ში აცხადებენ, მათ რიგებს მალე სხვა შოურუმებიც დაემატება.

ბამბის რიგი ძველ თბილისში ბამბით, მატყლითა და ჩითით მოვაჭრეთა ქუჩა იყო, რომელიც გვიან შუა საუკუნეებში გაჩნდა. მელიქის ქარვასლის ადგილას, რომელიც სიონის ქუჩის დასაწყისში მდებარე დიდი გადახურული ბაზარი იყო, 1904 წელს თბილისელმა არქიტექტორმა ღაზარ სარქსიანმა მანთაშევის რიგი ააშენა.

სავაჭრო რიგი მოდერნის სტილის ორი ნაგებობისგან შედგებოდა. ერთი ყოფილ არწუნის ქარვასლას ემიჯნება, მეორე კი ბამბის რიგისა და შარდენის ქუჩის ყოფილი ბნელი რიგის გამყოფ ზღუდედ აღიქმება.

მარიამ მორგოშია