აშშ-მა ვიზა არ მისცა ირანის საგარეო საქმეთა მინისტრ მოჰამად ჯავად ზარიფს, რომელიც 9 იანვარს, ნიუ-იორკში უნდა დასწრებოდა გაეროს უშიშროების საბჭოს სხდომას. ინფორმაციას აშშ-ის მთავრობის და დიპლომატიური წრეების წარმომადგენლებზე დაყრდნობით ავრცელებენ სააგენტო Reuters-ი და გამოცემა Foreign Policy.
სახელმწიფო დეპარტამენტში ოფიციალურ კომენტარზე უარი თქვეს. გაეროში ირანის წარმომადგენლის ინფორმაციით, საგარეო საქმეთა მინისტრის ვიზის საკითხზე ოფიციალური შეტყობინება ჯერჯერობით არ მიუღიათ.
გაეროსა და აშშ-ის შეთანხმებით, შეერთებული შტატები ვალდებულია გაეროს დაწესებულებებზე შეუფერხებელი წვდომა უზრუნველყოს უცხოელი დიპლომატებისთვის, მიუხედავად მთავრობებს შორის არსებული ურთიერთობებისა. ამასთან, ვაშინგტონი მიიჩნევს, რომ უფლება აქვს ვიზის გაცემაზე უარი თქვას უსაფრთხოების და ტერორიზმთან ბრძოლის მოსაზრებებიდან გამომდინარე.
აშშ-ის და ირანის ურთიერთობა უკიდურესად გამწვავდა მას შემდეგ, რაც 3 იანვარს, პრეზიდენტ დონალდ ტრამპის ბრძანებით, ამერიკელმა სამხედროებმა საჰაერო იერიში განახორციელეს ერაყის დედაქალაქ ბაღდადის საერთაშორისო აეროპორტთან, სადაც ირანელი გენერალი ყასემ სოლეიმანი იმყოფებოდა. 62 წლის სოლეიმანი „ირანის ისლამური რევოლუციის გუშაგთა კორპუსის“ შემადგენლობაში მყოფი „ყუდსის ძალების“ სარდალი იყო. „ყუდსი“ უცხოეთის ქვეყნებში მოქმედებს.
საჰაერო ოპერაციის შემდეგ ტრამპმა განაცხადა, რომ მოკლულია მსოფლიოში „ნომერ პირველი ტერორისტი“, რომელიც ბოლო 20 წლის განმავლობაში ახლო აღმოსავლეთში დესტაბილიზაციას უწყობდა ხელს და ამერიკელ დიპლომატებსა და სამხედროებზე თავდასხმებს გეგმავდა. გენერალ სოლეიმანის მკვლელობის გამო, ირანი აშშ-ს შურისძიებით დაემუქრა.
რადიო „თავისუფლება“