კალიფორნიაში დაფუძნებულმა სტარტაპმა Nano Diamond Battery გადამუშავებული ბირთვული ნარჩენებისგან ახალი ბეტა-გალვანური ელემენტი შექმნა, რომლის მუშაობის ვადაც, შესაძლოა, რამდენიმე ათასი წელი იყოს. მისი პროტოტიპი მეცნიერებმა ლივერმორის ლოურენსის სახელობის ლაბორატორიასა და კემბრიჯის უნივერსიტეტის კავენდიშის ლაბორატორიაში წარმატებით გამოცადეს. ტესტირების შედეგების შესახებ ინფორმაცია გამოცემაში New Atlas გამოქვეყნდა.
ამერიკული კომპანიის წარმომადგენელთა განცხადებით, მათ მიერ დამზადებულ ელემენტში ენერგომატარებლის სახით ატომურ ელექტროსადგურებში ექსპლუატაციის შემდეგ დარჩენილი რადიოაქტიური გრაფიტი გამოიყენება, რომლიდანაც რადიოიზოტოპი ნახშირბად-14 მიიღება. გარემოსა და ადამიანების უსაფრთხოების უზრუნველსაყოფად, ის სინთეტური ალმასებითაა დაფარული. რადიოაქტიური ელემენტის იზოტოპები ალმასის საფართან ურთიერთქმედებენ, რის შედეგადაც ბეტა-გამოსხივების ენერგია ელექტრულ დენად გარდაიქმნება.
მეცნიერების მიერ დიდ ბრიტანეთსა და ამერიკის შეერთებულ შტატებში მდებარე ლაბორატორიებში განხორციელებულმა ტესტირებამ აჩვენა, რომ კალიფორნიული სტარტაპის ახალი ქმნილება სინთეტური ალმასების საფუძველზე დამზადებულ სხვა ელემენტებს ხარისხით ბევრად აღემატება. ამ უკანასკნელთა ეფექტურობის ზრდა ტრადიციულ, მათ შორის ლითიუმ-იონის ელემენტებთან შედარებით, მხოლოდ 15 პროცენტი იყო, მაშინ, როდესაც Nano Diamond Battery-ის პროტოტიპის შემთხვევაში ანალოგიურმა მაჩვენებელმა 40 პროცენტი შეადგინა.
რადიოაქტიური ნარჩენებისგან შექმნილი ელემენტის გამოყენება სხვადასხვა დანიშნულებით იქნება შესაძლებელი, დაწყებული მობილური მოწყობილობებით - სმარტფონებითა თუ გაჯეტებით და დამთავრებული სატრანსპორტო საშუალებებით - მანქანებით, მატარებლებითა და თვითმფრინავებითაც კი. ნახშირბად-14-ის ნახევარდაშლისთვის საჭირო დიდი დროის გამო, ელექტრომობილში მისი მუშაობის ხანგრძლივობამ თეორიულად, შესაძლოა, 90 წელი შეადგინოს, დედამიწის ორბიტაზე მყოფი მცირე სიმძლავრის თანამგზავრის შემთხვევაში კი 28 ათასი წელი.~
ვარაუდობენ, რომ ახალი ტექნოლოგია ბაზარზე ამ დროისთვის გავრცელებულ ლითიუმის ელემენტებს ჩაანაცვლებს. რადიოქტიური ნივთიერების ნარჩენებით შექმნილი ელემენტები მათზე ბევრად იაფი ეღირება, გაცილებით დიდხანს გაძლებს და მეტ ენერგიასაც გამოიმუშავებს. მეცნიერები პროტოტიპის დახვეწას განაგრძნობენ და იმედოვნებენ, რომ ყოველდღიური მოხმარებისთვის განკუთვნილი ვერსია გაყიდვაში უახლოესი ორი წლის განმავლობაში ჩაეშვება.
POPX.GE