როგორ ხვდება COVID19-ის გამო გართულებულ ეპიდსიტუაციას ქვეყნის ერთ-ერთი უმსხვილესი საწარმო - „ჯორჯიან მანგანეზი“ - კომპანია, რომელიც 6000-მდე სამუშაო ადგილს ქმნის და მისი პროდუქციის წილი მთლიან ექსპორტში 6%-ს შეადგენს. ქვეყნის მასშტაბით სიდიდით მეოთხე კომპანიას, რომელიც უცხოური ვალუტის შემოდინების ერთ-ერთი მთავარი წყაროა ქვეყანაში, მუშაობა პანდემიის გავრცელების პირველი ტალღისა და საგანგებო მდგომარეობის დროსაც კი არ შეუჩერებია, თუმცა, რა ვითარებაა ახლა და როგორი მომზადებული ხვდება კომპანია გართულებულ ეპიდსიტუაციას - ამ და სხვა საკითხებზე კომენტარი „ჯორჯიან მანგანეზის“ დირექტორმა, მერაბ ლომინაძემ გააკეთა.
„გასულ პერიოდს თუ გადავავლებთ თვალს, დავინახავთ, რომ ჩვენს არცერთ ობიექტს პანდემიის გამო მუშაობა არ შეუწყვიტავს. „ჯორჯიან მანგანეზი“ არის მაგალითი იმისა, თუ როგორი უნდა იყოს თანაცხოვრება COVID19-ის პირობებში. კომპანია დღემდე მკაცრად და ზედმიწევნით ასრულებს ჯანდაცვის სამინისტროსა და დაავადებათა კონტროლის ეროვნული ცენტრის რეგულაციებს. ეპიდსიტუაციის გართულების მიუხედავად, „ჯორჯიან მანგანეზში“ დასაქმებულების უსაფრთხოება მაქსიმალურადაა დაცული“, - ამბობს მერაბ ლომინაძე.
კომპანიის დირექტორმა მძიმე მრეწველობის დარგში არსებულ არადამაიმედებელ პროგნოზებზე ისაუბრა და აღნიშნა, რომ, ეპიდსიტუაციის გათვალისწინებით, წლის ბოლომდე აღნიშნულ დარგში მოღვაწე ყველა კომპანიის საერთო საექსპერტო მაჩვენებლების, დაახლოებით, 20-25%-ით შემცირება მოხდება.
„ჩვენ შევედით იმ ციკლში, როდესაც სახეზე გვაქვს ფასების კლება, ფაქტობრივად, მძიმე მრეწველობის დარგს ორი მხრიდან ადგება დარტყმა: ერთი - საბოლოო პროდუქციის ფასის თვალსაზრისით, მეორე კი - სარეალიზაციო ბაზრებზე შემცირებული რაოდენობის თვალსაზრისით. ამას 1 წლის წინ კომპანია ნამდვილად არ ელოდა, როდესაც 2020 წლის ბიუჯეტი დგებოდა, თუმცა, ჩვენ ჩვენს პარტნიორებთან და ტრეიდერებთან, მივაღწიეთ იმას, რომ შევიმუშავეთ შესაბამისი გეგმა, რომელიც გულისხმობს სწორედ ასეთ, გართულებულ ვითარებაში კომპანიის ისე ოპერირებას, რომ ჩვენ შევძლოთ უკვე პოსტპანდემიურ პერიოდში, როდესაც კრიზისი გადაივლის, ჩვენი საწარმოო სიმძლავრეები მაქსიმალურად მოკლე დროში აღვადგინოთ და მოვახდინოთ არა მხოლოდ იმ ბაზრებზე დაბრუნება, სადაც ჩვენი პროდუქცია ისტორიულად იყიდება, არამედ შევეცადოთ, რომ ამ კრიზისულ ვითარებაში ახალ ბაზრებზეც შევაღწიოთ - მოგეხსნებათ, კრიზისის დროს ბაზარზე შეღწევა ყველაზე ადვილი გახლავთ.
თუმცა, ეს პროცესი საჭიროებს არა მხოლოდ ერთი დარგისა და ერთი კომპანიის ძალისხმევას, არამედ, ამ შემთხვევაში ყველა ის დარგი უნდა გაერთიანდეს, რომელიც პირდაპირ თუ ირიბად ჩართულია ფეროშენადნობთა წარმოებაში. მაგალითად, ჩვენი თვითღირებულების 25% ელექტროენერგია გახლავთ, და 2020 წლის მსგავსი მაღალი ფასი საქართველოს ენერგობაზარს არ ახსოვს - უკანასკნელი 10 წლის მანძილზე. ვფიქრობ, ეს პრობლემაა როგორც ნებისმიერი დარგის განვითარებისთვის, ისე კონკრეტულად ჩვენი კომპანიის მდგრადობის შესანარჩუნებლად, მით უფრო, კრიზისულ პერიოდში.
ამ ვითარებაში აუცილებელია, რომ ენერგეტიკის სექტორი და მეტალურგიის დარგი, ისევე - როგორც ზოგადად მძიმე მრეწველობა, რომელიც ელექტროენერგიას მოიხმარს და გახლავთ ქვეყნის შიგნით ელექტროენერგიის ძირითადი მომხმარებელი, უნდა შეჯერდეს გადარჩენის ერთობლივ გეგმაზე. სხვადასხვა დარგები, ერთობლივი ძალისხმევითა და სახელმწიფოს შუამდგომლობით, უნდა გავერთიანდნენ, უნდა ჩამოყალიბდეს ერთიანი გეგმა და მოხდეს იმ ქმედით ნაბიჯებზე შეჯერება, რომელიც ჩვენი კომპანიების გადარჩენას უზურუნველყოფს და რომელიც, თავის მხრივ, სამუშაო ადგილების შენარჩუნებას, ქვეყნის ბიუჯეტში შესაბამისი გადასახადების გადახდას და, ზოგადად, ქვეყნის მდგრადობის მიღწევას გულისხმობს“, - განაცხადა „ჯორჯიან მანგანეზის“ დირექტორმა, მერაბ ლომინაძემ.