პანდემიის პერიოდში დაწესებული ეკონომიკური შეზღუდვებისა და ლოქდაუნის შედეგად მივიღეთ ორნიშნა ეკონომიკური კლება. ჯერ კიდევ გაზაფხულზე პირველი ლოქდაუნის შედეგად, II კვარტალში 12,6%-იანი კლება დაფიქსირდა. გაზაფხულიდან შემოდგომამდე პერიოდი კი მთავრობამ გაანიავა. ის მოსამზადებელი პერიოდი რაც შეეძლოთ რომ გამოეყენებინათ ჯანდაცვის მიმართულებით მდგომარეობის გამოსასწორებლად საერთოდ არ იქნა გამოყენებული, აღებული საგარეო ვალიც არამიზნობრივად დაიხარჯა და რეალურად ის პრობლემები რაც უკვე შემოდგომის პერიოდში დადგა ეფექტიანად ვერ გადაჭრეს, არ მოხდა არც სამედიცინო პერსონალის გადამზადება, არც საწოლფონდების მობილიზება და სხვა, არ გადადგმულა ქმედითი ნაბიჯები სამედიცინო დაწესებულებებზე ზამთრის პერიოდში შესაძლო მომატებული მიმართვიანობის დასაკმაყოფილებლად, მთავრობის ეს უმოქმედობა მით უფრო გასაკვირია იმ ფონზე, რომ მათსავე განცხადებებში ჩანდა მოლოდინები, რომ ინფიცირების რიცხვი ზამთარში მოიმატებდა. ხოლო როცა პროგნოზი გამართლდა და გაიზარდა ინფიცირებულთა რაოდენობა და შესაბამისად საავადმყოფოებში მიმართვიანობა, მთავრობამ ყველაზე მარტივი გზა აირჩია და შეზღუდვების მეორე ეტაპი დაიწყო, ბიზნეს საქმიანობები შეზღუდა და შესაბამისად გაჩერებული ეკონომიკის სექტორების შედეგად ნოემბერში საქართველოს ეკონომიკა 7,7%-ით შემცირდა, ხოლო დეკემბერში -7,9%.
შეზღუდვებისა და გაჩერებული ეკონომიკის პირობებში 2020 წელს მშპ საშუალოდ 6,1%-ით შემცირდა, ხოლო 2021 წლის იანვარში 11,5%-იანი კლება დაფიქსირდა. მოგეხსენებათ, გასული წლის იანვარში გვქონდა 5,1%-იანი ეკონომიკური ზრდა, რაც ბოლო წლების ტენდენციიდან გამომდინარე, მაღალი ეკონომიკური ზრდა იყო, ხოლო ამ ფონზე როცა ვადარებთ მიმდინარე წლის იანვარს გასული წლის შესაბამის პერიოდს, 11,5%-იანი ეკონომიკური კლება კიდევ უფრო მძიმე მდგომარეობაზე მიანიშნებს.
ეკონომიკური მდგომარეობის გაუარესებაზე მიანიშნებს არამხოლოდ მშპ-ის კლება, არამედ ამ პერიოდში შემცირებული საგარეო ვაჭრობის მაჩვენებლები, შემცირებული პირდაპირი უცხოური ინვესტიციები, გაზრდილი ფასები და რაც ყველაზე მნიშვნელოვანია გაზრდილი უმუშევრობის დონე. ცხადია, როცა ეკონომიკა მცირდება, როცა ქვეყანა ნაკლებ პროდუქტს ქმნის ამ პროდუქტის შესაქმნელად ნაკლები დასაქმებული სჭირდება (იზრდება უმუშევრობის დონე), ნაკლები წარმოებული პროდუქტი ნიშნავს, რომ ექსპორტზეც ნაკლები პროდუქტი გაგვაქვს და შემცირებული წარმოებისა და შემცირებული შემოსავლების ფონზე იმპორტზეც მცირდება მოთხოვნა. ეს ყველაფერი კი პირდაპირი უცხოური ინვესტიციების მოზიდვის კლებასაც განაპირობებს, ასევე პანდემიის შედეგად გაჩერებული ტურიზმშიც თითქმის განულებულია ტურიზმიდან მიღებული შემოსავლები, რაც ჯაჭვურად ნიშნავს, რომ ქვეყანაში ნაკლები უცხოური ვალუტა შემოდის და უარყოფითად აისახება ლარის კურსზეც.
ამასთან უნდა აღვნიშნოთ, რომ მდგომარეობა კიდევ უფრო მძიმეა, ვიდრე ეს ოფიციალურ სტატისტიკურ მაჩვენებლებში ჩანს, რადგან ჩვენი ეკონომიკის დიდ ნაწილს არადაკვირვებადი ეკონომიკა შეადგენს, სადაც ძირითადად თვითდასაქმებულთა კატეგორიაა წარმოდგენილი, რომელთა სოციალური მდგომარეობა არც პანდემიამდე იყო სახარბიელო, ხოლო პანდემიის პირობებში კიდევ უფრო დამძიმდა, შედეგად ქვეყანაში უფრო მძიმე სოციალური მდგომარეობაა, ვიდრე ამას ოფიციალური სტატისტიკურ მაჩვენებლები ასახავს.
კომერსანტი