ინტერვენცია რომ არ განახორციელოს ეროვნულმა ბანკმა, გაცილებით უარესი შედეგი იქნება.  ბოლო 8 წლის მანძილზე ჩვენი ლარი 100 პროცენტით გაუფასურდა, ხოლო სომხური დრამი მაქსიმუმ 20 პროცენტით -  როგორ მოახერხა სომხეთმა ეს და რატომ ვერ ვინარჩუნებთ ჩვენ? საკითხავი ეს არის.. - ბიზნესმენი და მმართველი გუნდის ყოფილი დეპუტატი კახა ოქრიაშვილი მიიჩნევს, რომ ლარის ამ ტემპით ვარდნა პროდუქციაზე ფასების მკვეთრ ცვლილებას გამოიწვევს. ბოლო პერიოდში ეროვნული ბანკის მრავალჯერადი ინტერვენციის მიუხედავად ეროვნული ვალუტა რეკორდულ მაჩვენებელს მიუახლოვდა. რა მოლოდინებია ბიზნესში და რა გავლენას ახდენს იმპორტზე დამოკიდებული ქვეყნის ეკონომიკაზე ასეთი მკვეთრი გაუფასურება, ამ კითხვებით „კომერსანტი“ რამდენიმე ბიზნესმენს გაესაუბრა:

„ქვეყანა და ჩვენი ხალხი ისეთ მდგომარეობაშია, რომ რა თქმა უნდა, ბიზნესი არის ქვეყნისა და საზოგადოების ნაწილი, მაგრამ პირველ რიგში ადამიანებზე უნდა ვიფიქროთ იმიტომ, რომ ლარის კურსის მკვეთრი ვარდნა გამოიწვევს მთელ რიგ პირვლად პროდუქციაზე ფასების ზრდას და ეს არის მთავარი პრობლემა ჩემი აზრით. რა თქმა უნდა ბიზნესსაც აქვს პრობლემა, მაგრამ პირველ რიგში ადამიანებზე უნდა ვიფიქროთ.“ - განმარტავს კახა ოქრიაშვილი.

„რა თქმა უნდა მორიგი გაუფასურება კიდევ უფრო მეტად ართულებს ისედაც რთულ სიტუაციას პანდემიის  ფონზე.  რომ გითხრათ ეს მოულოდნელი იყო - არა,  ეს  ის  პოლიტიკური შედეგია, რომელსაც წლების მანძილზე ატარებს როგორც  ეროვნული ბანკი, ისე მთავრობა,“ - ამის შესახებ „კომერსანტს“ ბიზნესმენმა თამაზ დაუშვილმა განუცხადა.

ლარის კურსის მერყეობა ბიზნესის უმეტესობისთვის და მოსახლეობისთვის ნიშნავს გაზრდილ ფასებს , დაუშვილის თქმით, იმპორტზე დამოკიდებული ქვეყნისთვის ეს დროთა განმავლობაშ მოსახლეობის კიდევ უფრო გაღარიბებას გამოიწვევს.

  „ე.წ. მცურავი კურსი არის მხოლოდ და მხოლოდ  ტერმინი და  ამის უკან  დგას  მუდმივად  ფულადი მასის მატება, არასწორად დაგეგმილი ბიუჯეტი და ე.წ. ეკონომიკის  სტიმულირების მექანიზმები,  რაც  საბოლოო ჯამში იწვევს ლარის გაუფასურებას. ლარის გაუფასურება პირდაპირ დაკავშირებულია ფასების ზრდასთან,  ფასების  ზრდა დაკავშირებულია მოთხოვნის  შემცირებასთან. ჩვენ  იმპორტის  ქვეყანა  ვართ,  ეკონომიკის 75% -70%  შეადგენს იმპორტს და იმპორტთან დაკავშირებულ წარმოებებს.  ბუნებრივია, ეს მომენტალურდ  აისახება პროდუქტის და მათ  შორის მომსახურეობის ფასზე.  ასე რომ, ვფიქრობ, ეს  ძალიან  ცუდი  პრაქტიკაა  რომელიც, ძალიან მალე  უნდა დასრულდეს,  წინააღმდეგ  შემთხვევაში უბრალოდ  ცუდ  შედეგებს  მივიღებთ, მოსახლეობა კიდევ უფრო გაღარიბდება , ეკონომიკური  აქტივობა კიდევ უფრო  შემცირდება,“ - განმარტავს თმაზ დაუშვილი.

მარიამ მორგოშია