„2020 წლიდან საექსპორტო ღვინოების ინსპექტირებაში საერთაშორისო ორგანიზაციები ჩაერთვებიან“, -ამის შესახებ „კომერსანტს“ ღვინის ეროვნული სააგენტოს თავმჯდომარემ, ლევან მეხუზლამ განუცხადა. საერთაშორისო ორგანიზაციების შესარჩევი ტენდერის ჩატარება უახლოეს პერიოდში იგეგმება, თუმცა კონკრეტული დეტალების გავრცელებისგან „ღვინის ეროვნული სააგენტო“ ამ ეტაპზე თავს იკავებს.
Schuchmann Wines-ის გენერალური დირექტორი ნუცა აბრამიშვილი მიიჩნევს, რომ საექსპორტო ღვინოების ინსპექტირებაში საერთაშორისო ორგანიზაციების ჩართვა, მცირე და საშუალო ზომის ღვინის კომპანიებს, რომლებსაც საერთაშორისო სტანდარტის სერთიფიკატი არ გააჩნიათ, პრობლემებს შეუქმნის.
„ეს საკითხი ალბათ ადრეულ ფაზაშია, რადგან ინფორმაცია ჯერ ჩვენამდე არ მოსულა. საერთაშორისო კომპანიების მიერ შემოწმება, კონკრეტულად დეგუსტაციების დროს ანუ გაგზავნამდე არ ვიცი როგორ უნდა მოხდეს. მე ვფიქრობ, კომპანიების ინსპექტირება საწარმოებში მოხდება, რომ ნახონ რამდენად იცავს კომპანია ყველა მაღალ სტანდარტს წარმოების პროცესში, ამიტომ უფრო კომპლექსური საკითხი მგონია. თუმცა, აქ მთავარია არა საერთაშორისო კომპანიების ჩართულობა და შემოწმება, არამედ ის, რომ კომპანიებმა ღვინო საერთაშორისო სტანდარტებით აწარმოონ. თუ ეს კომპლექსური საკითხი იქნება, ვფიქრობ, მცირე და საშუალო დონის ღვინის კომპანიებს პრობლემა შეექმნებათ, რადგან მათ არ აქვთ მსხვილი კომპანიების მსგავსად საერთაშორისო სერთიფიკატი, რომელიც წარმოების ყველა პროცესში კონკრეტული სტანდარტების არსებობას გულისხმობს. მცირე კომპანიებს ეს ფუფუნება არ აქვთ, რადგან ამის მისაღებად რთული პროცესია გასავლელი, ამიტომ ვფიქრობ, მცირე ზომის მარნებსა და საშუალო ზომის ღვინის კომპანიებს შესაძლოა პრობლემა გაუჩნდეთ“, - აცხადებს ნუცა აბრამიშვილი.
„თელავის ღვინის მარნის” ხელმძღვანელი ზურაბ რამაზაშვილი თვლის, რომ საერთაშორისო ორგანიზაციების ჩართვის ნაცვლად, სასურველია ადგილობრივ ბაზარზე მოხდეს ისეთი ბიუროს მოძიება, რომელიც ინსპექტირებას მოახდენს.
„მართალია არგუმენტაცია არ ვიცი თუ რას ფიქრობს „ღვინის ეროვნულ სააგენტო“, მაგრამ ნუთუ ასე დავიღუპეთ, რომ საქართველოში ვერავინ ვნახეთ ისეთი, ვისაც ამ საქმეს ვანდობთ? მიკვირს, რომ საქართველოში ვერ მოიძებნა ან ვერ შეიქმნა ისეთი საერთაშორისო დონის ბიურო, რომელსაც ყველა ენდობოდა - ცოტა გაურკვეველია ეს ჩემთვის. სადღაც ვიღაცას ფული გადავუხადოთ, მაგას არ ჯობია ჩვენ თვითონ მივხედოთ ჩვენს თავს, ყოველ შემთხვევაში იმ დონეზე მაინც, რომ ღვინის ხარისხის კონტროლი შევამოწმოთ“, - აცხადებს ზურაბ რამაზაშვილი.
„თბილღვინოს“ პროდუქტების განვითარების მიმართულების ხელმძღვანელი ლაშა ლომაშვილი მიესალმება საექსპორტო ღვინის ინსპექტირებაში საერთაშორისო ორგანიზაციების ჩართვის იდეას და თვლის, რომ საერთაშორისო ბაზარზე გასატანი ღვინის შემოწმება გასამკაცრებელია.
„მივესალმებით ასეთ ფაქტს, თუ ეს გულისხმობს იმას, რომ უფრო ხშირად შემოწმდება საექსპორტო პროდუქცია და მოხდება გასატანი ღვინის კონტროლის გამკაცრება. ადრე იყო საუბარი, რომ გაიგზავნება საერთაშორისო ლაბორატორიაში და იქ მოხდება შემოწმება. ასევე კარგია ექსპორტზე გასვლამდე თუ მოხდება ყველა მანქანის კონტროლი, მთავარია ეს დროში არ გაჭიანურდეს, ამიტომ თუ აქ ლოკალურად გავძლიერდებით და აქ მოხდება საერთაშორისო ორგანიზაციების მიერ გაკონტროლება - ეს დადებითი ფაქტი იქნება. ქართული ღვინის რეპუტაციის ასამაღლებლად ეს სასიცოცხლოდ მნიშვნელოვანია. შესაძლოა, ზოგიერთ კომპანიას ასეთ შემთხვევაში პრობლემები შეექმნას, მაგრამ მარტივი პრინციპია - ძლიერები გადარჩებიან“, - აცხადებს ლაშა ლომაშვილი.
ნინო თამაზაშვილი