პანდემია ბიზნესის თითქმის ყველა სექტორზე ნეგატიურად აისახა. ერთ-ერთი ასეთი მიმართულება ლომბარდია. როგორც „ბიზნესპარტნიორმა“ გაარკვია, გამომდინარე იქიდან, რომ საკმაოდ ბევრი სავაჭრო ობიექტი დახურულია, ან თუ მუშაობს, შემცირებული რეალიზაციით, მცირე მეწარმეების ნაწილი ფინანსური სახსრების გარეშე დარჩა. ამან კი  სალომბარდე სესხზე მოთხოვნა გაზარდა.

ლომბარდ „ემ ფინანსის“ წარმომადგენელი ჯუმბერ მაჩიტიძე აცხადებს, რომ  საბანკო რეგულაციების გამკაცრებისა და პანდემიის ფონზე, დღეს ლომბარდს უფრო მეტად მცირე მეწარმეები აკითხავენ. მისი განცხადებით, საპროცენტო განაკვეთი თითქმის უტოლდება ბანკებში არსებულს, თუმცა, ლომბარდის უპირატესობაა სწრაფი სესხი, რომლისთვისაც 15 წუთია საჭირო. ეს კი მათთვის ძალიან მნიშვნელოვანია.

მაჩიტიძე აცხადებს, რომ მომხმარებელის კატეგორია, რომელიც ოჯახური სიტუაციის გამო ალომბარდებს ნივთს, ნაკლებადაა.

„რაც შეეხება გადახდისუნარიანობას,  მომხმარებლებში ეს მაჩვენებელი  90–95%-ია.  თუმცა, არის გარკვეული პრობლემები ვადებთან დაკავშირებით. პანდემიის გამო, ჩვენი ორგანიზაცია კონკრეტულ ვადებს არ აწესებს და საპროცენტო განაკვეთის შემოტანასაც არ ვითხოვთ. ვცდილობთ ხალხს მეტი კომფორტი შეუქმნათ. საერთო ჯამში, შემცირებულია კლიენტთა რაოდენობა.“– აღნიშნავს ჯუმბერ მაჩიტიძე.

განსხვავებული პოზიცია აქვს ლომბარდ „ლელას“ დირექტორს. მისი თქმით, ხალხს ძალიან გაუჭირდა, რამაც ლომბარდებიდან ნივთების გატანა დააპაუზა.

„ვცდილიბთ კლიენტს ჩაბარებული ნივთი არ დავუკარგოთ და ხელი შევუწოთ გადახდაში“– აცხადებს  ლელა თარგამაძე.

Business-partner.ge