მცირე მეწარმეებს გამოშვებული პროდუქცია მსხვილ სავაჭრო ობიექტებში ვერ შეაქვთ. პრობლემის ერთი ნაწილი მარაგებსა და მიწოდების წყვეტას უკავშირდება. მეორეა საგადასახადო ბარიერი, რის გადალახვაც მცირე მეწარმეების სტატუსის მქონე ადამიანებისთვის რეალურად შეუძლებელია. როგორც მცირე მეწარმეთა ასოციაციის ხელმძღვანელი დავით ქადაგიშვილი ,,კომერსანტთან“ აღნიშნავს, ყოველი 100 მეწარმიდან სტანდარტს 5 მცირე მეწარმეც შეიძლება ვერ აკმაყოფილებდეს.
შესაბამისად, ისინი ძირითადად ონლაინ გაყიდვებზე არიან გადართული ან საგამოფენო სივრცეების იმედად რჩებიან.
,,მცირე მეწარმეებს არ აქვთ პროდუქციის საკმარისი რაოდენობა, რომ მოამარაგონ დიდი რითეილი, მაგალითად, ქსელური მარკეტები, რომლებიც ითხოვენ კონკრეტულ მარაგებს თავიანთი ბიზნეს ინტერესებიდან გამომდინარე. თითოეულს რამდენიმე ფილიალი აქვს და მათ მიერ მოთხოვნილ პირობებს მცირე მეწარმე ვერ დააკმაყოფილებს. გარდა ამისა, მაღალია გადასახადი, რამდენიმე ათას ლარს აღწევს. ეს ფული მეწარმემ უნდა გადახადოს მხოლოდ იმისთვის, რომ დახლებზე წვდომა ჰქონდეს. ყოველი 100-დან 5 მეწარმეც შეიძლება ვერ აკმაყოფილებდეს ამ სტანდარტს, რეალურად ძალიან მცირე ნაწილს აქვს ამის შესაძლებლობა. დანარჩენი 95 ან მეტი ადამიანი იძულებულია, პროდუქციის რეალიზაციისთვის ალტერნატიული საშუალებები გამონახოს, უმეტესობა ასეთ გამოსავალს ონლაინ გაყიდვებში ხედავს“, - ამბობს დავით ქადაგიშვილი.
როგორც მცირე მეწარმეთა ასოციაციის ხელმძღვანელი განმარტავს, რეტრობონუსის შემთხვევაში, თუკი მეწარმე მსხვილ სუპერმარკეტში შეიტანს, ვთქვათ, 1000 ლარის პროდუქციას, მას აქვს ვალდებულება, რეტრობონუსის სახით, მაღაზიას ჩაურიცხოს გარკვეული თანხა საკუთარი სახსრებიდან, რაც წარმოუდგენელია. ამ დროს ნებისმიერ მომენტში შეუძლიათ გამოუცხადოს მეწარმეს, რომ მისი პროდუქცია არ არის გაყიდვების ტოპ-ათეულში და პროდუქცია გაყიდვიდან ამოიღონ, ხოლო რეტრობონუსი სუპერმარკეტს რჩება.
ამდენად, როგორც ქადაგიშვილი ამბობს, ასეთი მიდგომა აზარალებს მცირე მეწარმეს, რომელიც არ არის მზად, ეს ქსელები მოამარაგოს, რაც ძირითადი პრობლემაა.
რაც შეეხება გამოსავალს, შექმნილ სიტუაციაში, რათა მეწარმეებს სისტემატური გაყიდვების საშუალება ჰქონდეთ, მეწარმეთა ასოციაციის ინიციატივაა, გაკეთდეს ქართული პროდუქტების ქსელური მარკეტი, რომელშიც ეროვნული პროდუქცია გაიყიდება. ხოლო მცირე მეწარმეების შექმნილი ნაწარმი განსაკუთრებული პირობებით იქნება წარმოდგენილი და დაეხმარება სექტორს შემდგომი განვითარებისთვის.
გარდა ამისა, დავით ქადაგიშვილის თქმით, კარგი იქნება, თუკი სახელმწიფო დაუშვებს პრეცედენტს, რომ მცირე მეწარმე, უკვე არსებულ საცალო ქსელში დღგ-ს გადასახადისგან გათავისუფლდეს თუნდაც გარკვეული პერიოდის განმავლობაში, რაც ასევე დიდი შეღავათი იქნება.
მარი ჩიტაია