MaxinAI-ი ქართული კომპანიაა, რომელიც ხელოვნური ინტელექტისა და Big Data მიმართულებით მუშაობს, ინოვაციურ მიდგომებს ნერგავს და ბიზნესის ეფექტურობის გაზრდას უწყობს ხელს. MaxinAI-ი 2017 წელს იოსებ ხუციშვილმა, დავით ხოსროშვილმა, გიორგი ჯვარიძემ და ლევან ცინაძემ დააარსეს. კომპანიაში 80-ამდე ადამიანია დასაქმებული, სადაც შედიან როგორც შრომითი ხელშეკრულებით დასაქმებულები, ასევე კონტრაქტორები. კომპანიამ 5 წელიწადში, საქართველოსა და საზღვარგარეთ, 100-ზე მეტი პროექტი განახორციელა. ამ ეტაპზე MaxinAI-ი საერთაშორისო პარტნიორ კომპანია Gaea-სთვის სამ პროდუქტს ქმნის. ესენია: Nexus, Synkrato და Gaea.
MaxinAI-ისთვის ხელოვნური ინტელექტის მიმართულებით კონსულტაცია საქმიანობის მთავარი სფეროა, თუმცა მომხმარებლებს ისეთი ტრადიციული პროექტების კუთხითაც ემსახურება, როგორიცაა ჯავა, C# და სხვა ცნობილი კომპიუტერული ენები.
MaxinAI-ის ერთ-ერთი დამკვეთი ბრიტანული კომპანია ClimateX-ია, რომელსაც ახალი პლატფორმის შექმნაში ეხმარება, სადაც მომხმარებელი შეძლებს განსაზღვროს, როგორ შემცირდება მისი უძრავი ქონების ღირებულება, იმ ტერიტორიისთვის დამახასიათებელი, რომელიმე კლიმატური კატასტროფის (მეწყერი, წყალდიდობა, ა.შ.) წარმოშობის შემთხვევაში.
კომპანიის კიდევ ერთი პროექტი ამერიკული AI marketplace-ია. პლატფორმა მომხმარებელს საშუალებას აძლევს გამოაქვეყნოს ხელოვნური ინტელექტის მოდელის API (Application, Programming Interfaces) ან სხვისი მოდელის API გამოიყენოს. მსგავსი პლატფორმებია: Rapidapi.com, Huggingface.co.
„MaxinAI-ი პროგრამული უზრუნველყოფის ამერიკული გიგანტის Salesforce-ის პარტნიორი გახდა, რომელიც მსოფლიოს მასშტაბით CRM (მომხმარებელთან ურთიერთობის მართვა) პლატფორმების განვითარებით არის ცნობილი. ასევე გავაფორმეთ Amazon web services-თან (AWS) პარტნიორობაც, რომელიც მნიშვნელოვანია არა მარტო კომპანიისთვის, არამედ მთელი ეკოსისტემისთვის. რა საკვირველია, ეს კიდევ უფრო შეუწყობს ხელს საქართველოში ამ მიმართულების განვითარებას და ეკონომიკურ ზრდას“, აცხადებენ კომპანიაში.
რაც შეეხება ქართულ ბაზარს, კომპანია თანამშრომლობდა Phubber-თან და მის აპლიკაციაზე რეკომენდაციის ძრავა (recommender engine) შექმნა, რის შემდეგაც მომხმარებლის ე.წ. „ნიუს ფიდი“ მის მიერ მოწონებული კონტენტის მიხედვით იცვლება.
„კომპანიის განვითარების გზა გამოწვევებით იყო სავსე, მათ შორის იყო კვალიფიციური ინჟინრების ნაკლებობა ადგილობრივ ბაზარზე, რის გამოც AI სკოლის დაარსების იდეა გაჩნდა, რომლის ბაზაზეც დეველოპერების გადამზადება ხდებოდა. ამჟამად კომპანიას ძალიან დიდი გამოცდილების მქონე მრავალფეროვანი გუნდი ჰყავს, რომელიც ყველა ტიპის პროექტის განხორციელებას სრულყოფილად უზრუნველყოფს,“ აცხადებენ კომპანიაში.
2 კვირის წინ Bloomberg-მა MaxinAI-ზე სტატია დაწერა, რომელსაც შემდეგი სათაური აქვს - „MaxinAI აღმოსავლეთ ევროპაში პირველი AI კომპანია ხდება, რომელმაც ბლოკჩეინზე გადასვლა გამოაცხადა“. როგორც Bloomberg-ი წერს, MaxinAI-მა ბლოკჩეინით ტრანზაქცია საპილოტედ 2021 წელს განახორციელა და ამ მიმართულებით წარმატებით მუშაობს.
MaxinAI-ში მიაჩნიათ, რომ Bloomberg-ისა და Yahoo Finance-ს სტატიები კომპანიისთვის მნიშვნელოვანი სიახლეებია სადაც, MaxinAI-ი მსოფლიოს თავს კიდევ ერთხელ ახსენებს. „განსაკუთრებით სასიხარულოა ის ფაქტი, რომ კომპანია გარკვეულწილად ინოვაციების ჰაბადაა წარმოჩენილი,“ აცხადებენ MaxinAI-ში.
მოამზადა მაკა ბიბილაშვილმა