ტელემაუწყებლებს მიმდინარე წლიდან სავარაუდოდ კომუნიკაციის კომისიის იმ მოთხოვნის შესრულება მოუწევთ, რომლის თანახმად, მათ რეკლამის დამკვეთები და მათგან მიღებული შემოსავლები უნდა გაასაჯაროონ. შესაბამისად, მარეგულირებლ კომისიას ეძლევა უფლება, გაამჟღავნოს ტელევიზიების სარეკლამო შემოსავლები ჩაშლილად და საჯარო გახადოს თუ რომელი დამკვეთისგან რა თანხა მიიღეს მათ წლიურად. თავად მაუწყებლები ამ ტიპის ინფორმაციას კომერციულ საიდუმლოდ მოიაზრებენ და ამბობენ, რომ რეგულაციის ამოქმედებით, მარეგულირებელს დამატებითი ბერკეტი უჩნდება, რომ მედიაზე კონტროლი მოიპოვოს, რაც სამომავლოდ სარეკლამო ბაზარზე ნეგატიურად აისახება.

რაც შეეხება თავად სარეკლამო ბაზარს, კომერციული რეკლამიდან შემცირებული შემოსავლები (-9%) საარჩევნო წელს პოლიტიკური რეკლამის შემოსავლებმა დააკომპენსირა და შედეგად მაუწყებლებს ჯამურ სარეკლამო შემოსავლებში 11%-იანი ზრდა დაუფიქსირდათ. აქედან 13,9 მილიონი ლარი ფასიანი პოლიტიკური რეკლამებიდან მიღებული თანხაა.

შემოსავლების ყველაზე დიდი ვარდნა საზოგადოებრივ მაუწყებელს და ტელეკომპანია "რუსთავი 2"-ს ჰქონდათ. კერძოდ, "რუსთავი 2"-ის შემთხვევაში სარეკლამო შემოსავლები წლიურად 9.3 მილიონი ლარით შემცირდა, რაც შეეხება საზოგადოებრივ მაუწყებელს - მისმა შემოსავლებმა 344,000 ლარით იკლო.

ბოლო წლებში, სატელევიზიო სარეკლამო შემოსავლების 70%-ზე მეტს ორი მაუწყებელი - "იმედი" და "რუსთავი 2" იაკვებდნენ, თუმცა 2020 წელს სურათი შეიცვალა და სარეკლამო ბაზრის 79%-ს უკვე 4 მაუწყებელი -  იმედი, რუსთავი 2, მთავარი არხი და ტელეკომპანია პირველი ინაწილებენ.

რაც შეეხება პროგნოზებს, მაუწყებლები მიმდინარე წელს 2019 წლის ნიშნულზე დაბრუნებას არ ელიან. არსებული პროგნოზით, ზრდა მაქსიმუმ 5%-ის ფარგლებში იქნება. სარეკლამო ბაზრის გაჯანსაღება კი იმაზე იქნება დამოკიდებული, თუ რამდენად სწრაფად და ეფექტურად აღდგება ბიზნეს აქტივობა.

წყარო:businessformula.ge