„ინფექციური საავადმყოფოს დირექციის განცხადება არის მოსახლეობაში შეცდომაში შეყვანა და სიცრუის ტირაჟირება“-ასე გამოეხმაურა „კომერსანტთან“ „ავერსის“ გენერალური დირექტორი ირაკლი ფურცელაძე, ინფექციური პათოლოგიის, შიდსის და კლინიკური იმუნოლოგიის სამეცნიერო პრაქტიკული ცენტრის გენერალური დირექტორის, თენგიზ ცერცვაძის განცხადებას, რომ ინფექციურის შენობის გარემონტების საშუალებას მათ „ავერსი-ფარმა“ არ აძლევთ.
როგორც ცნობილია, ს.ს. ინფექციურის გენერალურმა დირექტორმა, თენგიზ ცერცვაძემ ტელეკომპანია „იმედის“ გადაცემა „შაბათის ქრონიკაში“ განაცხადა, რომ კომპანია „ავერსი ფარმა“ მათ რემონტის ჩატარების საშუალებას არ აძლევს და ეთერიდან ქვეყნის ხელმძღვანელობას მოუწოდა, რომ ხვალვე გასცენ შენობის გარემონტების ბრძანება.
„ავერსის“ გენერალური დირექტორი აცხადებს, რომ ინფექციურმა საავადმყოფომ ჯერ კიდევ ორი წლის წინ წერილობით მიმართა რემონტთან დაკავშირებით და თანხმობაც მიიღო, გარემონტდა ყველა ის შენობა, რომელიც დაკავებული ჰქონდა ინფექციურს. ფურცელაძის თქმით, იმ პერიოდში საავადმყოფო მათ იჯარას უხდიდა, დღეს კი ისინი აღნიშნულ თანხას აღარ იხდის.
„როგორ უნდა გაარემონტონ შენობა, როდესაც 2019 წლის 1 იანვრიდან ჩვენთვის იჯარა არ გადაუხდიათ და ფართი უკანონოდ აქვთ დაკავებული, უკანონოდ დაკავებულ შენობას ვერ გაარემონტებენ.ჩვენ ყველანაირი უფლება გვაქვს უკანონოდ დაკავებული შენობიდან გამოვუშვათ, მაგრამ ამას არ ვაკეთებთ, რადგან მაღალი პასუხისმგებლობა გვაქვს და ჩვენს მოსახლეობაზე ვფიქრობთ, სად უნდა წავიდნენ ასეთ დროს“-ამბობს ფურცელაძე.
„ავერსის“ გენერალური დირექტორის თქმით, წლების წინ ჯანდაცვის სამინისტროს უნდა უზრუნველყო მათი ალტერნატიული ფართით დაკმაყოფილება,რომ სტანდარტებით გათვალისწინებული მომსახურება პაციენტებისთვის გაეწია.
„ჩვენთვის დღემდე უცნობია, როგორც ჯანდაცვის სამინისტროდან ასევე ინფექციურიდან, როდის მოხდება ჩვენი კუთვნილი ფართის გათავისუფლება და იმ პერიოდის იჯარის ანაზღაურება, რაც მათ არ გადაუხდიათ.“-ამბობს ირაკლი ფურცელაძე.
ინფექციურ საავადმყოფოში ინფრასტრუქტურის მოწესრიგების საკითხს გამოეხმაურა პრემიერ-მინისტრის მრჩეველი, ჯანდაცვის ყოფილი მინისტრი, დავით სერგეენკოც.
„მე მართლაც, ადამიანურად ვწუხვარ და ეს ჩემი ბრალიც არის დიდწილად, რომ ჩემი მინისტრობის დროს, ვერ მოვახერხე ამ პრობლემის მოგვარება, დღემდე მძიმე ტვირთად მაწევს. შეიძლება ყველაზე მძიმე ტვირთი განვლილი მინისტრობიდან სწორედ ეს იყოს. ჩვენ, რამდენიმე მცდელობა გვქონდა ინფრასტრუქტურის მოსაგვარებლად, მაგრამ სამწუხაროდ, ვერ მოვახერხეთ ამის გაკეთება. 2013-14 წლების განმავლობაში იყო მცდელობა, მოვლაპარაკებოდით იურიდიულ დონეზე მეპატრონეს იმ კონტრაქტით, რაც არის გაფორმებული. ვერ შევთანხმდით ამ დეტალებზე. ამის შემდეგ გვქონდა მცდელობა, იგივე ფართი მოგვეძებნა, რომელსაც სახელმწიფო იქირავებდა და გადავიტანდით დაწესებულებას. სამწუხაროდ, ესეც ვერ მოხერხდა, სპეციფიკურია მოთხოვნები ინფექციური საავადმყოფოსთვის. შემდეგ იყო მოთხოვნა, გამოეყო ნაკვეთი უნივერსიტეტის ქუჩაზე. დავიწყეთ პროექტირება, მაგრამ ესეც ვერ მივიყვანე სამწუხაროდ ბოლომდე“, – განაცხდა დავით სერგეენკომ.
როგორც პრემიერის მრჩეველმა განაცხადა, ინფექციური კლინიკის გადატანა დიღომში იგეგმება, რასაც გარკვეული დრო დასჭირდება.
„ახლა არის,რამდენადაც ჩემთვის ცნობილია,გამზადებული ინფრასტრუქტურა დიღმის კლასტერში, სადაც საჭიროებს რამდენიმეთვიან გარკვეულ გადაკეთებას, სპეციფიკის გათვალისწინებით. ახალი აშენებული შენობაა, სადაც კლინიკა თავის პაციენტებით გადავა გადაკეთების შემდეგ. ამის შესახებ მე გავიგე ორი თვის წინ და ერთი წელი სჭირდება ამის მოგვარებას“, – განაცხადა დავით სერგეენკომ.
შეგახსენებთ, რომ გასულ წელს „კომერსანტი“ წერდა, რომ შეიძლება ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკულმა ცენტრს ფუნქციონირება შეეწყვიტა.
„ინფექციური პათოლოგიის შიდსისა და კლინიკური იმუნოლოგიის სამეცნიერო-პრაქტიკული ცენტრს“ წლის განმავლობაში 50 000 ზე მეტი ამბულატორიული პაციენტი და 5 000 მდე სტაციონარული პაციენტი ჰყავს. არსებული პრობლემების გამო, შესაძლოა მკურნალობის გარეშე დარჩენილიყვნენ შიდსით და სხვა ინფექციებით დაავადებული პაციენტები და საფრთხე შეექმნას C ჰეპატიტის ელიმინაციის პროგრამის განხორციელებას.
შპს „ავერსი–ფარმამ“ ტერიტორია, სადაც დღეს თბილისის ორი დიდი კლინიკა: სააქციო საზოგადოება „ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრი“ და შპს „ვახტანგ ბოჭორიშვილის სახელობის სეფსისის საწინააღმდეგო ცენტრები“ ფუნქციონირებენ, 2009 წლის 25 დეკემბერს, აუქციონზე, 12 250 000 აშშ დოლარად შეიძინა.
უფრო ზუსტად, ამ აუქციონზე „ავერსი–ფარმამ“ 58 175 კვადრადული მეტრი მიწის ნაკვეთი და 18 შენობა-ნაგებობა (მათ შორის, ინფექციურის, შიდსის და სეფსისი ცენტრის შენობები) იყიდა. თვითონ კლინიკები, როგორც იურიდიული პირები, მას არ შეუძენია და ისინი ჯერ კიდევ სახელმწიფოს მფლობელობაში რჩება.
კლინიკების პროფილის დროებით შენარჩუნების მიზნით, აუქციონის ოქმის თანახმად, „ავერსს“ დაევალა, რომ ორი წელი კლინიკებს პროფილურ მუშაობაში ხელს არ შეუშლიდა.სამი წლის გასვლის შემდეგ, „ავერსმა“ კლინიკის დირექტორებს არაერთი ოფიციალური წერილი გაუგზავნა და საკუთარი ტერიტორიების დაცლა სთხოვა. ალტერნატიული ფართის უქონლობის გამო, კლიკინებმა სხვაგან გადასვლა ამ დრომდე ვერ მოახერხეს.
ნათია ლომიძე