საკოორდინაციო საბჭოს 15 ივნისის სხდომაზე ვაქცინაციის პროგრამის განხორციელების ოპერაციული გეგმა დაამტკიცეს. გეგმა ივლისიდან მასობრივი იმუნიზაციის დასაწყებად ვაქცინაციის პუნქტებისა და პრპცესში ჩართული ბრიგადების ზრდას ითვალისწინებს. საბჭოსავე გადაწყვეტილებით სრულად ვაქცინირებული პირები რეგულარული ტესტირების ვალდებულებისგან გათავისუფლდებიან. განიხილება სხვა შეღავათებიც.
საბჭოს წევრებმა ასევე განიხილეს ქვეყანაში ვაქცინების დამატებითი დოზების შემოსვლის ვადები. აღინიშნა, რომ სხვადასხვა დასახელების ვაქცინის შემოსვლა ქვეყანაში ივლისიდან, ეტაპობრივად დაიწყება და წლის ბოლომდე, საქართველოში ჯამში 3.6 მილიონზე მეტი ვაქცინა იქნება მობილიზებული.
იმუნიზაციის პროცესის გააქტიურების პარალელურად, უწყებათაშორისი საკოორდინაციო საბჭოს რეკომენდაციის მიხედვით ვირუსის გავრცელების პრევენციისთვის პირბადის ტარება, სოციალური დისტანციის დაცვა და ხალხმრავალი შეკრებებისთვის თავის არიდება კვლავ მნიშვნელოვან ღონისზიებებად რჩება.
საქართველოში კორონავირუსის პირველი შემთხვევის გამოვლენიდან დღემდე, ვირუსით ინფიცირების 355 368 ლაბორატორიულად დადასტურებული შემთხვევა გამოვლინდა, საიდანაც 341 103 პირი გამოჯანმრთელდა, 5 083 ადამიანი კი გარდაიცვალა.
ვაქცინაციის პროგრამა საქართველოში 15 მარტს დაიწყო, 3 თვის თავზე სრულად ვაქცინირებულ პირთა რაოდენობა 69 197 ადამიანს შეადგენს, რაც მოსახლეობის 2%-ზე ნაკლებია და მძლავრი ანტივაქსერული განწყობების მიუხედავად ვაქცინაზე მოთხოვნა მიწოდებას მკვეთრად აჭარბებს.