Tesla-ს აქციების ფასის ზრდის შედეგად, ილონ მასკის ქონება 25 ოქტომბერს $25.6 მლრდ-ით $255 მლრდ-მდე გაიზარდა. თუ $25.6 მლრდ-ს 24 სთ-ში არსებულ წამების რაოდენობაზე (86 400) გავყოფთ, წამში $296 000-ს მივიღებთ. ერთ სულ მოსახლეზე შემოსავალი საქართველოში $4300-ა, რაც იმას ნიშნავს, რომ საშუალო სტასტისტიკურ ქართველს იმ თანხის გამოსამუშავებლად, რაც მასკმა 25 ოქტომბერს 1 წამში მიიღო, 69 წლიანი მუშაობა დასჭირდება, პენსიონერს კი პენსიაზე გასვლის შემდეგ კიდევ 280 წელი სიცოცხლე.
Forbes-ის დათვლით, ბიძინა ივანიშვილი სულ $4.8 მლრდ-ს ფლობს, რაც იმას ნიშნავს, რომ პლანეტის უმდიდრესმა ადამიანმა ერთ დღეში ქართველი მილიარდერის მთლიან ქონებასთან შედარებით 433%-ით მეტი გამოიმუშავა.
Forbes-ის სიაში ბიძინა ივანიშვილი 651-ე ადგილს იკავებს, $25.6 მლრდ-ით კი 70-ე ადგილზე აბიგაილ ჯონსონია. მარსის კოლონიზაციაზე მეოცნებე ანტერპრენერის მიერ 24 სთ-ში ნაშოვნი თანხაც კი უმდიდრესი ადამიანების ასეულში მოსახვედრად საკმარისი იქნებოდა.
Amazon-ის დამფუძნებელი ჯეფ ბეზოსი $193 მლრდ-ით მეორე ადგილზეა. მასკისა და ბეზოსის კაპიტალს შორის სხვაობა $62 მლრდ-ა. ამ სხვაობის ფლობა კი უმდიდრესი ადამიანების ოცეულში მოსახვედრადაც საკმარისია.
$25.6 მლრდ საქართველოს მთლიან შიდა პროდუქტზე 1.5-ჯერ მეტია. ლარებში ის 80 მლრდ-ს აჭარბებს და უფრო მეტია, ვიდრე 2017-2021 წლების ჯამური სახელმწიფო ბიუჯეტი.
Tesla-ს კაპიტალიზაცია ამ დროისთვის $1.029 ტრლნ-ა. ის პირველი ტრილიონერი საავტომობილო კომპანიაა.