„ეკონომიკური გუნდიც და საბიუჯეტო კომიტეტიც ყველა ეკონომიკურ პრობლემას კორონავირუსით ხსნიან და ყველაფერს კორონავირუსს აბრალებენ.“ - ამის შესახებ რადიო კომერსანტის გადაცემა პროფესიონალებში ახალგაზრდა ფინანსისტთა და ბიზნესმენთა ასოციაციის ვიცე-პრეზიენტმა პაატა ბაირახტარმა ისაუბრა.
მისი განცხადებით 2019 წლამდე მთლიან შიდა პროდუქტი ერთ სულ მოსახლეზე 4 წლის განმავლობაში ერთ ნიშნულზე იყო და არ იცვლებოდა. რაც შეეხება ეკონომიკის 4,3 %-იან ზრდას პაატა ბაირახტარი ფიქრობს, რომ ეს ფანტასტიკის სფეროა, რადგან ქვეყანაში ჯერ ვაქცინაციის პროცესიც კი არ დაწყებულა.
„მსოფლიოს 72 ქვეყანას ვაქცინაცია უკვე დაწყებული აქვს, ამ 72 ქვეყნიდან დაახლოებით 15-მა ქვეყანამ თავის მოსახლეობის 60%-ზე მეტი აცრა, ეს იმ რეალობაში როდესაც ჩვენთან უბრალოდ ჯერ დაანონსებულია, რომ დაახლოებით თებერვლის ბოლოსკენ შემოვა 27 000 დოზა ვაქცინა, რომელიც ჩვენი მოსახლეობის 0,5% -თვის არის სამყოფი. ეს რეალობა გვაქვს ვაქცინასთან დაკავშირებით და ამას ხაზი იმიტომ გავუსვი, რომ ვაქცინაცია ეკონომიკის გახსნასთან მჭიდრო კავშირშია“, - აღნიშნა პაატა ბაირახტარმა.
ბაირახტარის განმარტებით, ეროვნული ბანკის მონაცემებით, რომელიც ერთი კვირის წინ გამოქვეყნდა საქართველოს ექნება 4%-იანი ეკონომიკური ზრდა, ნეგატიური პროგნოზით კი ეს მაჩვენებელი 1%-ია.
„სავალუტო ფონდის პროგნოზით ჩვენ გვექნება 4,3% იანი ეკონომიკური ზრდა , რომელიც ბიუჯეტში ჩადებულ ეკონომიკურ ზრდასთან თანხვედრაში მოდის, მაგრამ საგულისხმოა რომ ეს პროგნოზი გამოქვეყნებულია მანამ სანამ ჩვენ ლოქდაუნის მეორე ტალღას ავამოქმედებდით. ახლა როცა ჩვენ ვნახავთ სავალუტო ფონდის მიერ განახლებულ პროგნოზს ის ნეგატიურისკენ იქნება დაძრული. ჩვენ პირველი კვარტალი მნიშვნელოვანი ლოქდაუნის პირობებში გავლიეთ, სამი კვარტალი გვრჩება, ამ სამი კვარტალში ბევრი დაშვების გაკეთება შეიძლება, მაგრამ ყველანი ვთანხმდებით იმაზე, რომ ეკონომიკას სრულად ზაფხულამდე ვერ გავხსნით. ზაფხულში რა მიმართულებით გაიხსნება ეკონომიკა და როგორი იქნება ტურიზმის მდგომარეობა არ ვიცით.
ეკონომიკაში 12%-ის კონტრიბუცია უჭირავს ტურიზმს და ესეთ რეალობაში, როდესაც პირველი კვარტალი უკვე დაკარგულია 4,3% ეკონომიკურ ზრდაზე საუბარი არის ზღაპარი და ფანტასტიკის სფერო და ამის მიღწევა მიმდინარე წელს გამორიცხულია“, - აღნიშნა პაატა ბაირახტარმა.
კითხვაზე თუ როგორ იმუშავა საქართველოს ეკონომიკაზე შიდა ტურიზმმა პაატა ბაირახტარის თქმით, 2020 წელს ზაფხულის კურორტებმა შიდა ტურიზმის ხარჯზე მეტნაკლებად იმუშავა და ადამიანებს საშუალება მიეცათ სახლში ლუკმაპური შეეტანათ, თუმცა მისი თქმით, ზამთრის კურორტებს ამის საშუალებაც არ მიეცათ და შიდა ტურიზმის ხარჯზეც ვერ იმუშავეს.