საქართველოში მართვის მოწმობის ასაღები თითო გამოცდის რეალურ მოძრაობაში ჩაბარების საფასური 90 ლარი იქნება.

როგორც „ინტერპრესნიუსს“ მომსახურების სააგენტოს დირექტორის მოადგილე იმედა მაკასარაშვილმა განუცხადა, არ იცვლება თეორიის გამოცდის ჩაბარების ღირებულება და ის იგივე - 40 ლარი იქნება.

„დახურული მოედნისთვის და თეორიული გამოცდისთვის საფასური არ იცვლება. კანდიდატი თეორიული გამოცდის ჩაბარების შემდეგ შეძლებს ხუთ უფასო გასვლას დახურულ მოედანზე და ამ კუთხით შეზღუდვა არ ექნება იმ საფასურში, რასაც დღეს იხდის. ხოლო, ქალაქის პირობებში საფასური იცვლება და როგორც კანონში არის მითითებული, B და BE კატეგორიისთვის საფასური შეადგენს 90 ლარს ერთჯერადად გასვლაზე“,- განაცხადა იმედა მაკასარაშვილმა.

კანონპროექტი მესამე მოსმენით უკვე მიღებულია. ახლად დამტკიცებული რეგულაციებით კი, მართვის მოწმობის გამოცდა რეალურ მოძრაობაში B და BE კატეგორიებისთვის 2022 წლის 25 აპრილიდან იქნება სავალდებულო.

ახალი კანონის ამოქმედებამდე, პრაქტიკულ გამოცდაზე მექანიკური გადაცემათა კოლოფის მქონე ავტომობილით 7 დღეში ერთხელ გასვლა უფასოა, ხოლო ფასიანი გასვლის საფასურია 30 ლარი. ავტომატური გადაცემათა კოლოფის მქონე ავტომობილით 7 დღეში ერთხელ გასვლის საფასური არის 40 ლარი, ხოლო ფასიანი გასვლისას ემატება 30 ლარი.

interpressnews.ge