„შთაბეჭდილება მრჩება, რომ არც ერთი მხარე არ ლაპარაკობს ბოლომდე. შეიძლება ვივარაუდოთ, რომ საუბარია კომერციული ბანკების მიერ არაპროფილურ აქტივებსა და არასასაბანკო საქმიანობაზე. აქედან გამომდინარე, ეროვნული ბანკის პოზიცია ჩემთვის გასაგებია“-ამის შესახებ „კომერსანტს“ ექსკლუზიურად აშშ-ში მცხოვრებმა  ფინანსისტმა  თემურ ბასილიამ ეროვნული ბანკის გუშინდელ განცხადებაზე კომენტირებისას განუცხადა. როგორც ცნობილია, მარეგულირებელმა საქართველოს კაპიტალის ჯგუფი საბანკო სისტემიდან დასაშვებზე მეტი დაფინანსების მიღების მცდელობაში დაადანაშაულა.

როგორც ბასილია აცხადებს, ეროვნული ბანკის მხრიდან  არაპროფილურ აქტივებსა და ბიზნესზე გაკეთებული  პირველი ხმამაღალი და  მწვავე განცხადებაა. შესაბამისად, მისი მხრიდან, ეს არის იმის აღიარებაც, რომ რეალურად, საქართელოს კაპიტალის ჯგუფს  არაპროფილური აქტივები გამიჯნული არ აქვს.

„ეს განცხადება სწორედ ამის დადასტურებაა. რაც შეეხება იმას, თუ რატომ ახლა და არა აქამდე, არვიცი, ფაქტია, რაღაც ხდება. ეროვნულ ბანკს გაცილებით მძიმე სიტუაციების დროს არ გაუკეთებია რაიმე განცხადება, ასევე ვიცით, რომ პრესასთან დიდად არ კონტაქტობდა და უცებ ასეთი მწვავე განცხადება.რაც შეეხება არაპროფილური აქტივების გამიჯვნას, თითქოს მიიღეს ამის თაობაზე გადაწყვეტილება, ასევე თითქოს დაიწყეს ეს პროცესი, მაგრამ უმრავლეს შემთხვევაში ეს გამიჯვნა მოხდა ქაღალდზე და რეალურად ეს ბიზნესები ისევ ერთი და იგივე ჯგუფის ხელშია. ამიტომაც, შესაძლოა ვინმეს ეს რეგულაციები არ მოსწონდეს საკუთარი ბიზნესის გადმოსახედიდან, მაგრამ მაკროეკონომიკური სტაბილურობის პოზიციიდან ყველა ბიზნესი, ყველა ბანკი უნდა დაემორჩილოს დაწესებულ რეგულაციებს. თუ მაკროეკონომიკური სტაბილურობა დაირღვა მთლიანი ზიანი გაცილებით დიდი იქნება.

ამავე დროს, ვულოცავ საქართველოს ჯანდაცვის ჯგუფს ევრობანკიდან საკრედიტო ხაზის გახსნას, დარწმუნებული ვარ, რომ ეს რესურსი მიზნობრივად და შედეგიანად იქნება გამოყენებული“-აცხადებს ბასილია.

შეგახსენებთ, ეროვნული ბანკის გუშინდელ განცხადებას საქართველოს ჯანდაცვის ჯგუფმა (GHG) რამდენიმე საათის წინ უპასუხა.  GHG აღნიშნავს, რომ სებ-ის მიერ გავრცელებული ინფორმაცია, იმის თაობაზე, თითქოს კომპანია ცდილობს, რომ კრიზისული ვითარებით ისარგებლოს და რეგულაციების მოთხოვნების დარღვევით მიიღოს დაფინანსება საქართველოს ბანკისგან ცალსახად არ შეესაბამება სინამდვილეს. GHG აცხადებს, რომ სებ-ის მიერ გაკეთებული ამგვარი ინტერპრეტაცია ყოვლად მიუღებელია.

სოფო ქსოვრელი