მარეგულირებელმა ავიაკომპანია Myway Airlines-ს საჰაერო ხომალდის ექსპლუატანტის სერტიფიკატი (AOC) შეუჩერა, ეს კი იმას ნიშნავს, რომ კომპანია ოპერირებას ვეღარ შეძლებს. Myway Airlines-თვის სერტიფიკატის შეჩერების მიზეზი არაგეგმიური აუდიტის შედეგად გამოვლენილი ნაკლოვანებები გახდა.
როგორც სამოქალაქო ავიაციის სააგენტოში (GCAA) აცხადებენ, ავიაკომპანიისთვის სერტიფიკატის შეჩერების საფუძველი სააგენტოს ფრენის უსაფრთხოების ინსპექტორების მიერ გამოვლენილი დარღვევები გახდა, რომლებიც ავიაკომპანიაში შექმნილი მართვის სისტემაში არსებული ხარვეზებიდან გამომდინარეობდნენ და უშუალო ზეგავლენას ახდენდნენ ფრენების უსაფრთხოებაზე.
„გაცნობებთ, რომ სამოქალაქო ავიაციის სააგენტოს მიერ „შპს მაივეი ეარლაინს კო ლტდ“-ში ჩატარებული კომპლექსური არაგეგმიური აუდიტის შედეგად გამოვლენილი ნაკლოვანებების საფუძველზე, საქართველოს საჰაერო კოდექსის, საჰაერო ხომალდის ექსპლუატანტის სერტიფიცირების და სამოქალაქო საავიაციო საქმიანობის ინსპექტირების წესების შესაბამისად, ავიაკომპანიას შეუჩერდა საჰაერო ხომალდის ექსპლუატანტის სერტიფიკატი (AOC).
სერტიფიკატის შეჩერების საფუძველი გახდა სააგენტოს ფრენის უსაფრთხოების ინსპექტორების მიერ გამოვლენილი 3 პირველი დონის (საქართველოს კანონმდებლობით დადგენილ მოთხოვნებთან, ავიასაწარმოს პროცედურებსა და სახელმძღვანელოებთან, მიწოდებული მომსახურებ(ებ)ის მიმართ განსაზღვრულ მოთხოვნებთან ან სერტიფიკატით დადგენილ პირობებთან ისეთი შეუსაბამობა, რომელიც აქვეითებს უსაფრთხოების დონეს ან მას უქმნის სერიოზულ საფრთხეს) და 19 მეორე დონის (კანონმდებლობის მოთხოვნებთან, ავიასაწარმოს პროცედურებსა და სახელმძღვანელოებთან, ან სერტიფიკატით განსაზღვრულ პირობებთან ისეთი შეუსაბამობა, რომელმაც პოტენციურად შეიძლება დააქვეითოს უსაფრთხოების დონე ან სერიოზული საფრთხე შეუქმნას მას.) ნაკლოვანება, რომლებიც გამომდინარეობდნენ ხსენებულ ავიაკომპანიაში შექმნილი მართვის სისტემაში არსებული ხარვეზებიდან და უშუალო ზეგავლენას ახდენდნენ ფრენების უსაფრთხოებაზე. შესაბამისად, ფრენის და მგზავრთა უსაფრთხოების ინტერესებიდან გამომდინარე და მოქმედი კანონმდებლობის შესაბამისად, „შპს მაივეი ეარლაინს კო ლტდ“-ს შეუჩერდა სერტიფიკატით მინიჭებული უფლებების შემდგომი განხორციელება და აეკრძალა ფრენები.
სერტიფიკატის მოქმედება შეჩერებულია იმ დრომდე, ვიდრე ავიასაწარმოს მიერ არ გამოსწორდება სააგენტოს მიერ გამოვლენილი დარღვევები. ნაკლოვანებების აღმოფხვრის შემოწმების და სერტიფიკატის მოქმედების ვადის აღდგენის საკითხები წესრიგდება შესაბამისი კანონმდებლობით”, – განუცხადეს AviaNews-ს სამოქალაქო ავიაციის სააგენტოში.