მას შემდეგ, რაც სვანეთის მოსახლეობა ელექტროენერგიის გადასახადისგან განთავისუფლდა, „ენერგო პრო ჯორჯიას“ ზარალი ამ მიმართულებით გაიზარდა. საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკი) ინფორმაციით, კომპანიის ზარალმა 2019 წლის 9 თვეში,  სვანეთისთვის მიწოდებული და გადაუხდელი ელექტროენერგიის ნაწილში, 7 მლნ. ლარი შეადგინა.

მარეგულირებელი კომისიის თავმჯდომარე დავით ნარმანიას  რამდენიმე კვირის წინ გაკეთებული განცხადებით, ცუდია, რომ მესტიის მოსახლეობა ელექტროენერგიის გადასახადს არ იხდის.”საკუთარი განცხადება კი კიდევ ერთხელ დაუდასტურა „კომერსანტს“ და ხაზი გაუსვა, რომ როდესაც ყოველწლიურად  მთავრობა 30 მლნ. ლარზე მეტს ხარჯავს, რათა მოწყვლად ჯგუფებს კომუნალურების გადასახადი შეუმსუბუქდეს, ამ ფონზე სვანეთის ელექტროენერგიის გადასახადისგან განთავისუფლება მიზანშეწოლილად არ მიაჩნია.

„მართალია 90-იანებიდან ასე მოდის და მოსახლეობაც შეჩვეულია ფაქტს,  მაგრამ მაშინ, როდესაც სიმძლავრემ მოიმატა, მოთხოვნა ბევრად გაზრდილია ელექტროენერგიაზე, ქსელი დაიტვირთა. ამის გამო „ენერგო პრო ჯორჯია“ ვერ ახერხებს მინიმალური რესურსებით ქსელის მომსახურებას. კომერციული ობიექტები იხდიან გადასახადს, ფიზიკური პირები კი ვერ.  სწორედ ამის გამო მიმაჩნია საჭიროდ, რომ საკითხს გადავხედოთ.“-აცხადებს დავით ნარმანია.

მარეგულირებელი კომისიის თავმჯდომარემ ისიც განმარტა, რომ  მთავრობა სამომხმარებლო ტარიფების სუბსიდირებას არ ახდენს. მისი თქმით,გაზის ნაწილში მთვარობამ და ნავთობის და გაზის კორპორაციამ,  საკუთარი რესურსით მოახერხეს,  რომ  ტარიფი კურსთა შორის დაკავშირებული ცვლილების გამო არ გაზრდილიყო .

მესტიის მოსახლეობის ელექტროენერგიის გადასახადისგან განთავისუფლებასთან ერთად,  რეგიონში ბიკტოინის მაინერების წარმოების საკითხი, რომ ისევ დღის წესრიგში დგას ეს დავით ნარმანიამ „კომერსანტთან“ საუბრის დროსაც აღნიშნა. მისი თქმით, საკითხზე მუშაობას აუცილებლად დაიწყებენ და მარეგულირებელი კომისია ამ მიმართულებით იმუშავებს.

„სვანეთში  კრიპტოვალუტის წარმოებამ  ქსელი საკმაოდ  დაამძიმა. ამიტომ საჭიროდ მიმაჩნია, რომ  კრიპტოვალუტა  ჩაეხსნას ქსელს. ამ თემაზე დაუყოვნებლივ იქნება ერთობლივი მუშაობა.  ჩვენ როგორც მარეგულირებელი კომისია აუცილებლად შევიტანთ წვლილს,  ჩავერთვებით სამუშაო პროცესში და საკმაოდ მკაცრად გადავხედავთ საკითხს.“-ამბობს დავით ნარმანია.

შეგახსენებთ, რომ  ზემო სვანეთის რეგიონის მცხოვრებლები ელექტროენერგიის ტარიფს არ იხდიან. ქვეყნის სხვა მაღალმთიან დასახლებებში მთავრობა სამომხმარებლო ტარიფის 50 %-იან სუბსიდირებას ახდენს, სვანეთში კი მოსახლეობა დენის ტარიფის გადახდისგან გათავისუფლებულია.

რეგიონში კი, ელექტროენერგიის ქსელის მზარდი დატვირთვის გამო და უფასო ელექტროენერგიის ჭარბად გამოყენებამ  ბიტკოინების მაინერების ასამუშავებლად, სვანეთის სოფლები ჩააბნელა.  მსურველებს უფასოდ შეუძლიათ ნებისმიერი რაოდენობის ელექტეროენერგია მოიხმარონ, რათა ბიტკოინებით შემოსავალი მიიღონ.

ნათია ლომიძე