ვირუსმა ევროპის იმ ერთადერთ ქვეყანაშიც შეაღწია, რომელშიც COVID-19 დაფიქსირებული ამ დრომდე არ იყო. მონტენეგროში ინფიცირების უკვე 2 შემთხვევაა. კორონავირუსმა უკვე მთელი ევროპა მოიცვა. ევროკავშირი საზღვრებს 30 დღით კეტავს. საგანგებო რეჟიმზე გადასვლის გადაწყვეტილება დღეს დამატებით მიიღო კიდევ რამდენიმე ქვეყანამ, მათ შორის მოლდოვამ და ბოსნია-ჰერცეგოვინამ. საგანგებო მდგომარეობა ამოქმედდა დღეს კოლუმბიასა და ბოლივიაშიც.
კვლავ მძიმეა ვითარება იტალიაში, საფრანგეთსა და ესპანეთში. მხოლოდ იტალიაში ვირუსისგან დაღუპულთა რაოდენობა 2 ათას 500-ს გასცდა. ესპანეთში 533 დაღუპულია, საფრანგეთში კი 175. ათასობით არის დაინფიცირებულების რაოდენობა.
"მაქსიმუმ, 2 კვირაში ინფიცირების შემთხვევები კლებას დაიწყებს, მაგრამ ეს პერიოდი ფრთხილად უნდა გადავიაროთ, რადგან, შესაძლოა, ადამიანი ვირუსის მატარებელი იყოს, თუმცა სიმპტომები არ აღენიშნებოდეს. ეპიდემიასთან ბრძოლისთვის მკაცრი ზომები უნდა გავატაროთ, ეს ყველაფერი, ცხადია, დროს მოითხოვს,"- განაცხადა საფრანგეთის ჯანდაცვის მინისტრმა ოლივიე ვერანმა.
"ეპიდემიას ჩვენს ეკონომიკაზე დიდი გავლენა აქვს. ეს არის შოკი მთელი მსოფლიოსთვის. მსგავსი ფაქტის წინაშე აქამდე არ ვყოფილვართ. ვირუსი არის ჩვენი მტერი და ყველაფერი უნდა გავაკეთოთ იმისთვის, რომ ჩვენი მოქალაქეები დავიცვათ. აშკარაა, რომ მასთან ბრძოლა კიდევ დიდხანს მოგვიწევს, ამიტომ ყოყმანის გარეშე გავატარებთ უმკაცრეს ზომებს,"- განაცხადა ევროკომისიის პრეზიდენტმა ურსულა ვონ დერ ლეიენმა.
ექიმები აცხადებენ, რომ ვირუსთან ბრძოლის ყველაზე ეფექტური საშუალება პრევენცია და კონტროლია.
"ვირუსის დასამარცხებლად ყველაზე მნიშვნელოვანი პრევენცია და კონტროლია. მკურნალობა მეორეხარისხოვანია. თუ გსურთ ეფექტური შედეგი მიიღოთ, აუცილებელია კარგი სტრატეგია და დროული რეაგირება,"- განაცხადა ექიმმა.
"გარემო, რომელშიც ჩვენს ექიმებს უწევთ მუშაობა, არის ძალიან სტრესული. მძიმეა უყურო იმას, თუ როგორ იხოცებიან პაციენტები შენს თვალწინ. ჩემი რჩება ექიმების მაგალითზე, რომ დაისვენოთ და არ ინერვიულოთ, რადგან ეს მხოლოდ ნეგატიურად აისახება მიმდინარე პროცესზე. გთხოვთ, გაუფრთხილდეთ თავს,"- განაცხადა ექიმმა.
rustavi2.ge
კორონავირუსი
