„მიუხედავად იმისა, რომ ქვეყანაში საგანგებო მდგომარეობაა გამოცხადებული, ჩვენთან წარმოება ამ დრომდე შეუფერხებლად მიმდინარეობს“,- ამის შესახებ კომერსანტს „იფქლში“ განუცხადეს. კომპანიაში განმარტავენ, რომ ვირუსის გავრცელების პირველ კვირაში პროდუქციაზე მოთხოვნა მნიშვნელოვნად გაიზრდა. თუმცა, მათი თქმით, მას შემდეგ რაც მომხმარებლებში შიშის ტალღამ მეტნაკლებად გადაიარა, გაყიდვები უკვე სტაბილურ რიცხვს დაუბრუნდა.

აღსანიშნავია, რომ ქართულ წარმოებაზე უარყოფით გავლენას მოახდენს რუსეთში ხორბალზე რეკორდულად გაზრდილი ფასი. „იფქლში“ ამბობენ, რომ მაქსიმალურად ითვალისწინებენ იმ მძიმე კრიზისულ ფონს, რაც საქართველოში კორონავირუსის გავრცელებას მოჰყვა და ყველანაირად ცდილობენ გაზრდილი ხარჯები პურის ფასზე არ ასახონ.

„დღევანდელ დღემდე ერთ ტომარა ხორბლის ფქვილი 46.50-47.50 ლარამდე მერყეობდა. რამდენიმე მომწოდებელმა უკვე შეგვატყობინა რომ ტომარა ფქვილის ფასი ბაზარზე 1 ლარით გაიზარდა. ისინი არ გამორიცხავენ, რომ ახლო მომავალში ფასის ზრდის ტენდენცია შენარჩუნდება. ფქვილი ჩვენს საქმიანობაში ერთ-ერთი მნიშვნელოვანი კომპონენტია ფასწარმოქმნის პროცესში. აღნიშნულ სიტუაციაში ძალიან რთულია, პრაქტიკულად წარმოუდგენელია, რაიმე სახის პროგნოზების გაკეთება. ნედლეულის ფასი დღეს ბაზარზე უკვე კრიტიკულ ზღვარზეა. ვიმედოვნებთ, რომ ანტიკრიზისული რეგულაციები, რომლებიც ბოლო პერიოდში გატარდა, შეინარჩუნებს არსებულ სიტუაციას და არც ერთ პურის მწარმოებელს არ მოგვიწევს პროდუქტზე ფასის გადახედვა უახლოეს მომავალში“, - განაცხადებს „იფქლში“.

კიდევ ერთი ფაქტორი,რომელიც უარყოფით გავლენას ახდენს მეპურეებზე ეროვნული ვალუტის გაუფასურებაა. კომპანიაში აცხადებენ, რომ ნებისმიერი დამატებითი ხარჯი ამ სიტუაციაში ბიზნესისთვის დამატებითი წნეხია. როგორც „იფქლში“ აცხადებენ, კომპანია მიესალმება ნებისმიერ ნაბიჯს, რომელიც მიზნად ისახავს ეროვნული ვალუტის გამყარებას და პირველადი მოხმარების პროდუქტებზე ფასის შენარჩუნებას. მათ იმედი აქვთ, რომ ის ნაბიჯები რაც აქამდე გადაიდგა კრიზისის დასაძლევად ახლო მომავალში პოზიტიურ შედეგებს მოიტანს ეროვნული ვალუტის გასამყარებლად, რაც შემდგომში თავისთავად აისახება ხორბლის ფქვილის ფასზეც.

„ნედლეულის ხარჯებს ეროვნული ვალუტის გაუფასურების გამო ემატება იმ სხვა პირველადი მოხმარების პროდუქტების ფასის ზრდა ბაზარზე, რომლებსაც ჩვენ საზღვარგარეთიდან ვიღებთ. ესენია: შესაფუთი მასალები, დაზგა-დანადგარები, წარმოებისათვის საჭირო ზეთები, დანადგარების სათადარიგო ნაწილები და სხვა. ბუნებრივია სრულ შეფუთვებზე გადასვლაც კომპანიისათვის დამატებითი ხარჯია. გარდა გაძვირებული შეფუთვებისა, ჩვენ მოგვიწია დასაქმებული თანამშრომლების რიცხვის გაზრდა და რამდენიმე ძვირადღირებული შესაფუთი დანადგარის შეძენა საზღვარგარეთ.  ბუნებრივია, ნებისმიერი დამატებითი ხარჯი ამ სიტუაციაში ჩვენს ბიზნესზე უარყოფითად აისახება“ ,- ამბობენ კომპანიაში.

„იფქლში“ აცხადებენ, რომ ვირუსის გავრცელებიდან 1 კვირაში თანამშრომელთა ნაწილი- ადმინისტრაცია, ბუღალტერია, პიარისა და მარკეტინგის სამსახური დისტანციურ მუშაობაზე გადაიყვანეს. ხოლო მცხობელები, მფუთავები და დისტრიბუტორები მუშაობას უცვლელ რეჟიმში აგრძელებენ. „კომერსანტთან“ საუბარში კომპანიის წარმოამდეგენლი განმარტავს, რომ კორონავირუსმა მნიშვნელოვნად შეცვალა კომპანიის ყოველდღიურობა საწარმოში.  მათი თქმით, ყველაზე მნიშვნელოვანი ცვლილება იყო ის, რომ იფქლის დასახელების ყველა პროდუქტი მაღაზიის დახლებზე მხოლოდ სრულად შეფუთულ, თავმოკრულ მდგომარეობაში იყიდება. იმისთვის, რომ წარმოებული პროდუქციის სრულად შეფუთვა მოასწრონ, კომპანიამ ცვლები დაამატა და თანამშრომლების რიცხვი გაზარდა.

„მნიშვნელოვნი ცვლილებები შევიტანეთ ყოველდღიურ რუტინაში. კერძოდ, მთლიან საწარმოს უკვე რამდენიმე არაგეგმიური დეზინფიქცირება ჩავუტარეთ და აღნიშნულის გამეორებას გარკვეული დროის შემდეგ ისევ ვგეგმავთ. თითოეულ ადამიანს, კომპანიაში შემოსვლამდე დისტანციურად ეზომება ტემპერატურა. ასევე, საწარმოს ყველა თანამშრომელს აქვს წვდომა სადეზინფექციო საშუალებებზე, რომლითაც დღის განმავლობაში რამდენჯერმე იმუშავებენ ხელებს. როგორც ყოველთვის, ახლაც, თანამშრომლები მუშაობენ მხოლოდ ხელთათმანით და პირბადეებით. ყოველდღიურად სველი წესით მუშავდება ჩვენი სადისტრიბუციო ავტომობილები და პურის ყუთები. დისტრიბუტორებს გამყოფილი აქვთ სადეზინფექციო საშუალებები, რომლებსაც თითოეულ მაღაზიაში პურის შეტანამდე იყენებენ. ვირუსის გავრცელებიდან ძალიან მალევე, ჩვენი წარმოება პროდუქციის სრულ შეფუთვაზე გადავიდა. არსებული ქაღალდის შეფუთვები ჩავანაცვლეთ ცელოფნის გრძელი შეფუთვებით, რომლებსაც სპეციალური ლენტით ვუკრავთ თავს და მხოლოდ ამის შემდეგ ვუშვებთ წარმოებაში. ეს ძალიან მნიშვნელოვანი დეტალია იმისათვის, რომ 100%-ით გამოვრიცხოთ პურის დაბინძურების საშიშროება თაროებზე“, - განმარტავენ „იფქლში“.

ბაჩო ადამია