საქართველოში მოქმედმა ორმა უმსხვილესმა კომერციულმა ბანკმა 2020 წელს მენეჯმენტზე ჯამურად დაახლოებით 47 მლნ ლარი დახარჯა.
2020 წლის ანგარიშის მიხედვით, საქართველოს ბანკმა დირექტორატს 29,101,901 ლარი, სამეთვალყურეო საბჭოს 2,536,183 ლარი, ხოლო სხვა მატერიალური რისკების ამღებ პირებს 3,171,097 ლარი გადაუხადა. რაც სხვა ბანკებთან შედარებით, მენჯმენტზე დახარჯული ყველაზე მაღალი მაჩვენებელია.

გარდა ამისა, საქართველოს ბანკის გადავადებული ანაზღაურების მოცულობა 79,865,716 ლარს შეადგენს, 2020 ფინანსური წლის განმავლობაში გადახდილი გადავადებული ანაზღაურების მთლიანი მოცულობა კი 12,603,935 ლარს.

ბანკის უმაღლესი მენეჯმენტი, რომელიც 14 ძირითადი პირისგან შედგება (ნილ ჯანინი, ალასდაირ ბრიჩი, თამაზ გიორგაძე, ჰანნა ლოიკაინენი, ჯონათან მუირი, სესილ დაერ ქუილენ, ვერონიკ მაკქეროლ, არჩილ გაჩეჩილაძე, სულხან გვალია, გიორგი ჭილაძე, ლევან ყულიჯანიშვილი, მიხეილ გომართელი, გიორგი ფაილოძე, ვახტანგ ბობოხიძე, სხვა მატერიალური რისკის ამღები პირები) 1,548,837 აქციას ფლობს. აქედან ყველაზე მეტი 370,973 აქცია გენერალური დირექტორის არჩილ გაჩეჩილაძის მფლობელობაშია, რომელთა ღირებულება 23 მლნ დოლარამდეა. მეორე ადგილზე მიხეილ გომართელია 323,442 აქციით, ხოლო მესამეზე გიორგი ჭილაძე 308,366 აქციით.

მართალია საქართველოს ბანკმა მენეჯმენტზე ყველაზე მეტი თანხა დახარჯა, თუმცა ყველაზე მდიდარი ბანკირის სტატუსს კვლავ თიბისი ბანკის წარმომადგენელი იკავებს, მამუკა ხაზარაძის შემდეგ ეს სტატუსი, 2020 წლის ანგარიშების მიხედვით, ვახტან ბუცხრიკიძეს ერგო.
2020 წლის მონაცემებით, თიბისი ბანკმა 7 მენეჯერს, მილიონ-მილიონ ლარზე მეტი გადაუხადა, მათ შორის დირექტორატს 10,417,009 ლარი, სამეთვალყურეო საბჭოს 1,714,217 ლარი, ხოლო სხვა მატერიალური რისკების ამღებ პირებს 1,017,429 ლარი.

გარდა ამისა, თიბისი ბანკის გადავადებული ანაზღაურების მოცულობა 97,989 ლარს შეადგენს, 2020 ფინანსური წლის განმავლობაში გადახდილი გადავადებული ანაზღაურების მთლიანი მოცულობა კი 9,863,255 ლარს უდრის.

ბანკის უმაღლესი მენეჯმენტი, რომელიც 8 ძირითადი პირისგან შედგება (ბუცხრიკიძე ვახტანგ, შაგიძე გიორგი, ენუქიძე ნიკოლოზ, მასურაშვილი ნინო, თხელიძე გიორგი, ქურდიანი ნიკოლოზ, მეგრელიშვილი გიორგი, გოგიჩაიშვილი თორნიკე, სხვა მატერიალური რისკის ამღები პირები) 1,341,315 აქციას ფლობს. აქედან ყველაზე მეტი 502,511 აქცია ვახტანგ ბუცხრიკიძის მფლობელობაშია, რომელთა ღირებულება 28 მლნ დოლარს აღწევს. მეორე ადგილზეა ნინო მასურაშვილი 331,089 აქციით, მესამეზე კი გიორგი შაგიძე 188,563 აქციით.

ნინო თამაზაშვილი